GHSS KAMBALLUR ; Email:prncplkmbllur@gmail.com ; Ph.No.04672220870 : July 2018

OUR MESSAGE

കമ്പല്ലൂര്‍ ഗവ. ഹയര്‍ സെക്കണ്ടറി സ്കൂള്‍ ജൂബിലി ഉദ്ഘാടന വേളയില്‍ അവതരിപ്പിച്ച റിപ്പോര്‍ട്ട് : അറിവ് അഗ്നിയാണ്‌. അറിവിന്റെ പൊള്ളല്‍ സുഖകരമായ അനുഭവമാണ്‌. അറിവിനുവേണ്ടിയുള്ള ഒരു ജനതയുടെ സ്വപ്നങ്ങളുടെ സാക്ഷാത്കാരമാണ്‌ കമ്പല്ലൂര്‍ ഗവ: ഹയര്‍ സെക്കന്ററി സ്കൂള്‍. മലബാര്‍ ഡിസ്ട്രിക്ട് ബോര്‍ഡിന്റെ അനുമതിയോടെ ഏകാധ്യാപക വിദ്യാലയമായി ഔപചാരികമായി 1954 മുതല്‍ പ്രവര്‍ത്തനമാരംഭിച്ച ഈ വിദ്യാലയത്തിന്‌ അതിനുമേറെ പഴക്കമുള്ള അക്ഷരസ്നേഹത്തിന്റെ ചരിത്രമുണ്ട്. 1939ൽ ശ്രീ നല്ലൂര്‍ ഗോവിന്ദന്‍ നായരുടെ നേതൃത്വത്തില്‍ ആരംഭിച്ച എഴുത്താശാന്‍ കളരിമുതല്‍ ഈ ചരിത്രം ആരംഭിക്കുന്നു. തുടര്‍ന്ന് ചില കാലയളവുകളില്‍ മുടങ്ങിയും വീണ്ടും തുടങ്ങിയും മുന്നോട്ടു നീങ്ങിയ കമ്പല്ലൂരിലെ കുടിപ്പള്ളിക്കൂടത്തിനുപിന്നില്‍ നിസ്വാര്‍ത്ഥരായ ഒരുകൂട്ടം ഗ്രാമീണമനുഷ്യരുടെ ത്യാഗനിര്‍ഭരമായ സേവനങ്ങളുടെയും യാതനകളുടേയും നീണ്ടകഥകളുണ്ട്. ഔപചാരിക കാലഘട്ടത്തിനു മുന്‍പ് എഴുത്താശാന്മാരായി സേവനമനുഷ്ടിച്ച സര്‍വ്വശ്രീ മരാര്‍ കുഞ്ഞിരാമന്‍ , ആമന്തറ കൃഷ്ണന്‍ നായര്‍, പാലാട്ട് ശങ്കരന്‍അടിയോടി എന്നിവരുടെ സേവനങ്ങള്‍ ഈ അവസരത്തില്‍ ആദരപൂര്‍വ്വം അനുസ്മരിക്കുന്നു. ഒപ്പം ആദ്യകാലഘട്ടത്തിലെ വിദ്യാലയ നിര്‍മ്മാണപ്രവര്‍ത്തനങ്ങള്‍ക്ക് നേതൃത്വപരമായ പങ്കു വഹിച്ച സര്‍വ്വശ്രീ നല്ലൂര്‍ ഗോവിന്ദന്‍ നായര്‍, മാവില കമ്മാരന്‍നായര്‍, കൈപ്രവന്‍ കൃഷ്ണന്‍ നായര്‍, നല്ലുര്‍ കുഞ്ഞിക്കണ്ണന്‍ നായര്‍, പാറപ്പുറത്ത് മമ്മു, പെരിന്തട്ട പറ്റിഞ്ഞാറേ വീട്ടില്‍ കണ്ണന്‍, വടക്കേ വീട്ടില്‍ അച്ചു, കൈപ്രവന്‍ കുഞ്ഞപ്പന്‍നായര്‍, തെങ്ങുംതറ കൃഷ്ണപൊതുവാള്‍, സി വി കുഞ്ഞമ്പു, സി പി കുഞ്ഞിക്കണ്ണന്‍ നായര്‍, സി പി നാരായണന്‍ നായര്‍, പയ്യാടക്കന്‍ കുഞ്ഞിരാമന്‍ നായര്‍, അലാമി കണ്ണന്‍, പി കെ കണ്ണന്‍, മുണ്ടയില്‍ അമ്പു, പന്നിക്കേന്‍ കുമാരന്‍, കുണ്ടിലേ വീട്ടില്‍ നാരായണന്‍, ആട്ടി ചെറിയമ്പു എന്നിവരെ ഈ അവസരത്തില്‍ ആദരപൂര്‍വ്വം അനുസ്മരിക്കുന്നു. കൂടാതെ ആദ്യകാല അധ്യാപകരായിരുന്ന ഒളവറയിലെ ശ്രീ പി വി ബാലകൃഷ്ണൻ മാസ്റ്റര്‍, ശ്രീ വി കെ നാരായണന്‍ മാസ്റ്റര്‍ എന്നിവരേയും . സ്വന്തം കൈവശസ്ഥലം വിദ്യാലയാവശ്യത്തിനായി വിട്ടുതന്ന വിദ്യാലയ സ്ഥാപകന്‍ കൂടിയായ ശ്രീ നല്ലൂര്‍ ഗോവിന്ദന്‍ നായരേയും ദാനാധാരമായി പ്രസ്തുത സ്ഥലത്തിന്റെ രേഖ കൈമാറിത്തന്ന കമ്പല്ലൂർ കോട്ടയില്‍ ശ്രീമതി ശാന്തകുമാരിയമ്മയേയും ഈ അവസരത്തില്‍ കടപ്പാടോടും കൃതജ്ഞതയോടുകൂടി ഓര്‍ക്കുന്നു. 1957ല്‍ ശ്രീ ഇ എം എസ് നമ്പൂതിരിപ്പാടിന്റെ നേതൃത്വത്തില്‍ നിലവില്‍ വന്ന സര്‍ക്കാര്‍, ഏകാധ്യാപക വിദ്യാലയത്തെ എല്‍ പി സ്കൂളായും 1964ല്‍ യു പി സ്കൂളായും ഉയര്‍ത്തി. 1980-81ല്‍ശ്രീ ഇ കെ നായനാര്‍ മുഖ്യമന്ത്രിയായപ്പോള്‍ ഈ വിദ്യാലയം ദീര്‍ഘകാലത്തെ ജനകീയാവശ്യം പരിഗണിച്ച് ഹൈസ്കൂളായി അപ്ഗ്രേഡുചെയ്തു. ഈ അവസരത്തില്‍ വിദ്യാലയ വികസനത്തിനായി പരിമിതമായ വിലയ്ക്ക് സ്ഥലം നല്കാന്‍ തയ്യാറായ സര്‍വ്വശ്രീ കൊച്ചു നാരായണന്‍ മാസ്റ്റര്‍, പത്മിനി ടീച്ചര്‍, നല്ലൂര്‍ കുഞ്ഞിരാമന്‍ നായര്‍, മുട്ടിയറ ചെല്ലപ്പന്‍ എന്നിവരേയും നന്ദിപൂര്‍വ്വം അനുസ്മരിക്കുന്നു. 1990-91 ല്‍ കേരളത്തില്‍ ആദ്യമായി ഹയര്‍ സെക്കന്ററി വിദ്യാലയങ്ങള്‍ ആരംഭിച്ചപ്പോള്‍ അന്നത്തെ മുഖ്യമന്ത്രിയായിരുന്ന ശ്രീ ഇ കെ നായനാര്‍ ഉദ്ഘാടനം നിര്‍വ്വഹിച്ചതിലൂടെ കേരളത്തിലെ ആദ്യ ഹയര്‍ സെക്കന്ററി എന്ന വിശേഷണവും ഈ വിദ്യാലയത്തിന്‌ ഒരു പൊന്‍തൂവലായി. ഇതിനു വേണ്ടി അശ്രാന്ത പരിശ്രമം ചെയ്ത അന്നത്തെ ഗ്രാമവികസന ബോർഡ് ചെയര്‍മാനും ഈ കെ നായനാരുടെ മണ്ഡലം പ്രതിനിധിയുമായ ശ്രീ സി കൃഷ്ണന്‍നായരുടെ സേവനവും ഈ അവസരത്തില്‍ സ്മരിക്കുന്നു. ഇന്ന് വിദ്യാലയത്തിന്‌ ഷഷ്ഠിപൂര്‍ത്തിയും ഹയര്‍സെക്കന്ററിക്ക് രജതരേഖയും തികയുമ്പോള്‍ അഭിമാനപൂര്‍വ്വം ഈ നാടിനെ സാക്ഷിനിര്‍ത്തി ഞങ്ങള്‍ക്ക് പറയാനാകും. കഴിഞ്ഞുപോയ കാലയളവുകളില്‍ • നാടിന്റെ സമ്പൂര്‍ണ്ണമായ പിന്തുണയോടെയാണ്‌ ഈ വിദ്യാലയം വളര്‍ച്ചയുടെ ഓരോ പടവുകളും കയറിയിട്ടുള്ളത്. • ഓരോ കാലഘട്ടങ്ങളിലും മികച്ച നിലവാരമുള്ള വിദ്യാഭ്യാസമാണ്‌ പകര്‍ന്നു നല്കാനായിട്ടുള്ളത്. • കലാ കായിക മേഖലകളില്‍ ഓരോ കാലയളവുകളിലും മികച്ച പ്രതിഭകളെ സൃഷ്ടിക്കുവാന്‍ വിദ്യാലയത്തിന്‌ കഴിഞ്ഞിട്ടുണ്ട്. അതിന്‌ ഉദാഹരണമാണ്‌ ഇപ്പോള്‍ നടക്കുന്ന ദേശീയ ഗെയിംസില്‍ വനിതാ വിഭാഗം ബീച്ച് ഹാന്‍ഡ്ബോളില്‍ കേരളത്തെ പ്രതിനിധാനം ചെയ്യുന്ന എ വി രശ്മി, കെ വി നീതു, അനുശ്രീ ടി കെ എന്നിവര്‍. • എസ് എസ് എല്‍ സി, ഹയര്‍ സെക്കന്ററി പരീക്ഷകളില്‍ മികച്ച വിജയശതമാനം നിലനിര്‍ത്തി വരുന്നുണ്ട്. എസ് എസ് എല്‍ സിയി ല്‍തുടര്‍ച്ചയായ നാലാം വര്‍ഷവും നൂറു ശതമാനം നിലനിര്‍ത്തുവാന്‍ കഴിഞ്ഞിട്ടുണ്ട്. • എന്‍എസ്സ് എസ്സ്, സ്കൗട്ട് & ഗൈഡ്സ്, ജൂനിയർ റെഡ്ക്രോസ്സ് തുടങ്ങിയ സംഘടനകള്‍ സാമൂഹ്യപ്രതിബദ്ധതയുള്ള നിരവധി പ്രവര്‍ത്തനങ്ങളിലൂടെ വിദ്യാര്‍ഥികളില്‍ സാമൂഹ്യബോധം വളര്‍ത്തുവാനും നാടിന്‌ ദിശാബോധം പകരുവാനും നിരന്തരമായ പ്രവര്‍ത്തനങ്ങളില്‍ ഏര്‍പ്പെട്ടുവരുന്നു. • സംസ്ഥാനതലത്തില്‍ പ്രവര്‍ത്തന മികവിനുള്ള പരിസ്ഥിതി മന്ത്രാലയത്തിന്റെ മികച്ച ഭൂമിത്രസേനാ ക്ളബ്ബിനുള്ള പുരസ്കാരം, മലയാള മനോരമയുടെ പലതുള്ളി പുരസ്കാരം തുടങ്ങിയ അംഗീകാരങ്ങള്‍. • ജില്ലാ തലത്തില്‍ വര്‍ഷങ്ങളായി മികച്ച ജൂനിയര്‍ റെഡ്ക്രോസ്സ് യൂണിറ്റ്, മികച്ച ശുചിത്വ വിദ്യാലയം മലയാള മനോരമയുടെ വഴിക്കണ്ണ്‌ പുരസ്കാരം, ജലശുദ്ധി പരിശോധനയ്ക്കുള്ള പുരസ്കാരം, നല്ലപാഠം പുരസ്കാരം തുടങ്ങിയ അംഗീകാരങ്ങള്‍. • മലയാളത്തിന്റെ പ്രിയ കഥാകാരനായ ശ്രീ സി വി ബാലകൃഷ്ണന്‍ മാസ്റ്റര്‍, നിരൂപകനും ബാലസാഹിത്യകാരനും ശാസ്ത്രസാഹിത്യകാരനുമായ ശ്രീ പി പി കെ പൊതുവാള്‍, മികച്ച അധ്യാപകനുള്ള ദേശീയ പുരസ്കാരം നേടിയ ശ്രീ വി പി എസ് നമ്പൂതിരി, , മികച്ച എന്‍ എസ്സ് എസ്സ് പ്രോഗ്രാം ഓഫീസര്‍ക്കുള്ള സ്പെഷ്യല്‍പുരസ്കാരം നേടിയ ശ്രീ സി കെ രാധാകൃഷ്ണന്‍ മാസ്റ്റര്‍ തുടങ്ങി അവാര്‍ഡുകളിലൂടെയും അല്ലാതെയും പ്രവര്‍ത്തന മികവുകളിലൂടെ ബഹുമാനിതരായ ഗുരുശ്രേഷ്ഠന്മാര്‍. • മികച്ച അധ്യാപക രക്ഷാകര്‍ത്തൃ സമിതികളിലൂടെ വിദ്യാലയ പുരോഗതിക്കായി നിരവധി പരിശ്രമങ്ങള്‍ ഉണ്ടായിട്ടുണ്ട്. • അധ്യാപനം ജീവിതവ്രതമാക്കിയ നിരവധി അധ്യാപകശ്രേഷ്ഠരുടെ കാല്പാടുകള്‍ പതിഞ്ഞ ഈ സരസ്വതീ ക്ഷേത്രം അവരുടെ അര്‍പ്പണ ബോധത്തിന്റെ ജീവനുള്ള സ്മാരകമാണ്‌. • അവര്‍ തെളിച്ച തിരിവെട്ടത്തെ ദീപശിഖകളായി നെഞ്ചേറ്റിയ അനവധിപേരുടെ ജീവിതവിജയത്തിന്റെ നിത്യസ്മാരകമാണ്‌ ഈ വിദ്യാലയം. ഇവിടെ അക്ഷരം കുറിച്ച് അതിര്‍ത്തികളില്‍ രാജ്യത്തെ കാത്തവരും കാക്കുന്നവരുമായ ജവാന്മാര്‍, കായിക മേഖലയിൽ രാജ്യത്തിനും കേരളത്തിനും വേണ്ടി കഴിവു തെളിയിച്ച പ്രതിഭകള്‍, പൊതുപ്രവര്‍ത്തന മികവിലൂടെ സമൂഹമനസ്സുകളില്‍ സ്ഥാനം നേടിയ നിരവധിപേര്‍, കലാപരമായി കഴിവുതെളിയിച്ചവര്‍, വിവിധ തൊഴില്‍ മേഖലകളില്‍ രാജ്യസേവനം നടത്തുന്നവര്‍, മണ്ണിനെ പൊന്നാക്കുന്ന കര്‍ഷകര്‍, അദ്ധ്വാനശീലരായ നിരവധിപേര്‍. അവര്‍ ചെയ്ത് സഹായങ്ങള്‍ നന്ദിപൂര്‍വ്വം ഓര്‍ക്കുന്നു, വിദ്യാലയ പുനര്‍നിര്‍മ്മാണത്തിന്‌ അവരുടെ നിര്‍ലോപമായ സഹായങ്ങള്‍ പ്രതീക്ഷിക്കുന്നു. ഇങ്ങനെ വളര്‍ച്ചയുടെ പടവുകള്‍ ഓരോന്നായി കയറുമ്പോഴും പരാതികളുടേയും പരിവട്ടങ്ങളുടേയും ഒരു പരമ്പരതന്നെ പറയാന്‍ ബാക്കിയുണ്ട്. • ഹയര്‍ സെക്കന്ററി ഹൈസ്കൂള്‍ ക്ളാസ് മുറികള്‍ക്ക് സൗകര്യമുള്ള ലാബും ലൈബ്രറിയും മറ്റു സംവിധാനങ്ങളുമുള്ള ഒരു കെട്ടിട സമുച്ചയം നമ്മുടെ അനിവാര്യതയാണ്‌. പ്രത്യേകിച്ചും 1985ല്‍ ശ്രീ ഒ ഭരതന്‍ ഏം എല്‍ എ ആയിരിക്കേ അന്നത്തെ വിദ്യാഭ്യാസവകുപ്പു മന്ത്രി ശ്രീ ടി എം ജേക്കബ്ബ് ഉദ്ഘാടനം ചെയ്ത രണ്ടു നില കെട്ടിടം ഉപയോഗ്യ ശൂന്യമായിക്കൊണ്ടിരിക്കുമ്പോള്‍. • വിദ്യാലയത്തിന്‌ ആവശ്യമുള്ള മികച്ച ഇരിപ്പിട സൗകര്യങ്ങള്‍. • അസംബ്ളി ഹാള്‍. • സ്മാര്‍ട്ട് സൗകര്യങ്ങളോടു കൂടിയ ക്ളാസ് മുറികള്‍ • ഹയര്‍ സെക്കന്ററിക്ക് മികച്ച സൗകര്യങ്ങളോടു കൂടിയ കമ്പ്യൂട്ടര്‍ ലാബ്. • റീഡിംഗ് റൂം ഉള്‍പ്പെടെയുള്ള ലൈബ്രറി കോംപ്ളക്സ്. • കുട്ടികള്‍ക്ക് ഇരുന്നു ഭക്ഷണം കഴിക്കാനുള്ള ഊട്ടുപുര. • കിഡ്സ് പ്ളേ പാര്‍ക്ക്. • ടോയിലറ്റ് കോമ്പ്ളക്സ്. തുടങ്ങി ആവശ്യങ്ങള്‍ ഇനിയുമേറെയാണ്‌. ഭരണകൂടത്തിന്റേയും ജനപ്രതിനിധികളുടേയും പൊതു സമൂഹത്തിന്റേയും പിന്തുണയോടെ ഭൗതിക സാഹ ചര്യത്തിലും അക്കാദമിക നിലവാരത്തിലും രാജ്യാന്തര നിലവാരത്തിലേക്ക് ഈ വിദ്യാലയത്തെ ഉയര്‍ത്തുവാനുള്ള പരിശ്രമങ്ങളുടെ തുടക്കമാകട്ടെ ഈ ജൂബിലി വര്‍ഷമെന്നു ആഗ്രഹിച്ചുകൊണ്ട് ഈ റിപ്പോര്‍ട്ട് സമര്‍പ്പിക്കുന്നു. തയ്യാറാക്കിയത് ബൈജു കെ.പി , ബ്ലോഗിലേക്ക് ലിപി പരിഷ്കാരത്തോടെ പകര്‍ത്തിയത്- രാധാകൃഷ്ണന്‍ സി കെ

Friday, July 27, 2018

എ പി ജെ അബ്ദുള്‍കലാം ദിനം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ സാമൂഹ്യശാസ്ത്ര ക്ലബ്ബിന്റെ നേതൃത്വത്തില്‍ എ പി ജെ അബ്ദുള്‍ കലാമിന്റെ ചരമദിനമായ ജൂലൈ 27ന് അദ്ദേഹത്തിന്റെ ജീവിതത്തെ അനുസ്മരിച്ചു. കുട്ടികള്‍ ചാര്‍ട്ടുകള്‍ തയ്യാറാക്കുകയും അനുസ്മരണപ്രഭാഷണങ്ങള്‍ നടത്തുകയും ചെയ്തു.

കാര്‍ഗില്‍ വിജയദിനം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ സാമൂഹ്യശാസ്ത്രം ക്ലബ്ബിന്റെ നേതൃത്വത്തില്‍ കാര്‍ഗില്‍ വിജയദിനം ആചരിച്ചു. കുട്ടികള്‍ കാര്‍ഗില്‍ യുദ്ധവുമായി ബന്ധപ്പെട്ട ചാര്‍ട്ടുകള്‍ തയ്യാറാക്കുകുയും ധീരജവാന്‍മാരുടെ ത്യാഗനിര്‍ഭരമായ ജീവിതത്തെ അനുസ്മരിക്കുകയും ചെയ്തു.

മഴക്കുഴികളുമായി ജെ ആര്‍ സി

ഓടുന്ന മഴവെള്ളത്തെ നടത്താന്‍ മഴക്കുഴികളുമായി ജൂനിയര്‍ റെഡ്ക്രോസ്സ്. കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലാണ് ജെ ആര്‍ സി കേഡറ്റുകള്‍ മഴവെള്ളത്തെ കുഴിയിലാക്കിയത്. ജെ ആര്‍ സി കൗണ്‍സിലര്‍ കെ ആര്‍ ലതാഭായി നേതൃത്വം നല്‍കി. ജലസംരക്ഷണപ്രവര്‍ത്തനങ്ങളേക്കുറിച്ചുള്ള ബോധവല്‍ക്കരണ പ്രവര്‍ത്തനങ്ങളും കേ‍ഡറ്റുകള്‍ ആസൂത്രണം ചെയ്തിട്ടുണ്ട്.

സാഹിത്യവേദി സര്‍ഗസംഗമം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ സാഹിത്യ വേദിയുടെയും വിദ്യാരംഗം കലാസാഹിത്യവേദിയുടേയും ആഭിമുഖ്യത്തില്‍ സര്‍ഗസംഗമം സംഘടിപ്പിച്ചു. സാഹിത്യവേദി സെക്രട്ടറി ഹര്‍ഷ ഗംഗാധരന്‍ സ്വാഗതമാശംസിച്ചു. സാഹിത്യവേദി പ്രസിഡന്റ് അലീന ജോസഫ് അധ്യക്ഷത വഹിച്ചു. ശ്രീകാന്ത് സി ജോര്‍ജ്ജ ബര്‍ണാഡ്ഷായേയും ലതാഭായി കെ ആര്‍ ജോസഫ് മുണ്ടശ്ശേരിയേയും ബാലാമണി പി ബി പ്രേംചന്ദിനേയും അമൃത ബി വൈക്കം മുഹമ്മദ് ബഷീറിനേയും അനുസ്മരിച്ച് സംസാരിച്ചു. പത്മനാഭന്‍ പി എം ടിയുടെ ലോകങ്ങളെക്കുറിച്ച് പ്രഭാഷണം നടത്തി. അശ്വതി ശശി, അമല തോമസ്, നന്ദന കെ പി, ഷറഫിയ എ ജി, അനശ്വര പി എന്നിവര്‍ സ്വന്തം രചനകള്‍ അവതരിപ്പിച്ചു. ശ്രിലക്ഷ്മി പി പി, ശ്രേയ കെ പി എന്നിവര്‍ അവരുടെ വായനാനുഭവങ്ങള്‍ പങ്കുവച്ചു. പ്രിന്‍സിപ്പാള്‍ കെ ഡി മാത്യു, സിമി ജോസ് എന്നിവര്‍ പരിപാടിക്ക് ആശംസകളര്‍പ്പിച്ചു സംസാരിച്ചു. സാഹിത്യവേദി കോഡിനേറ്റര്‍ കെ പി ബൈജു കുട്ടികളടെ രചനകളെ ക്രോഡീകരിച്ചു സംസാരിച്ചു. സാഹിത്യവേദി ജോയന്റ് സെക്രട്ടറി ദില്‍ന ടി കെ ചടങ്ങിന് നന്ദിയറിയിച്ചു.

സാഹിത്യവേദി യോഗം ജൂലൈ 18

ഗവ. ഹയര്‍ സെക്കന്ററി സ്കൂള്‍ കമ്പല്ലൂര്‍

സാഹിത്യവേദി സര്‍ഗസംഗമം

2018 ജൂലൈ 27 വെള്ളിയാഴ്ച ഉച്ചയക്ക് 1 മണിക്ക്

സ്കൂള്‍ ഓഡിറ്റോറിയത്തില്‍

പ്രിയ സുഹൃത്തേ,

കുട്ടികളുടെ സര്‍ഗാഭിരുചികള്‍ക്ക് കാലഘട്ടത്തിന്റെ പ്രകാശദീപ്തി പകരുന്നതിനും നാം കടന്നുവന്ന ഇന്നലെകളെ ഓര്‍മ്മപ്പെടുത്തുന്നതിനും കൂട്ടായ സംവാദങ്ങള്‍ക്ക വേദിയൊരുക്കുന്നതിനുമായി പ്രവര്‍ത്തിച്ചു വരുന്ന സാഹിത്യവേദിയുടെ പ്രവര്‍ത്തനങ്ങള്‍ക്ക് പുതിയ ദിശാബോധം പകര്‍ന്നുകൊണ്ട് ഈ അധ്യയനവര്‍ഷത്തെ പ്രവര്‍ത്തനങ്ങള്‍ക്ക് സമാരംഭം കുറിച്ചുകൊണ്ട് 2018 ജൂലൈ 27ന് വെള്ളിയാഴ്ച ഉച്ചയ്ക്ക് 1മണിക്ക് സര്‍ഗസംഗമം നടക്കുകയാണ്. ഈ അവസരത്തില്‍ ഏവരുടേയും സാന്നിധ്യവും സഹകരണവും പ്രതീക്ഷിക്കുന്നു,

കമ്പല്ലൂര്‍, സെക്രട്ടറി/പ്രസിഡന്റ്

26-07-2018. സാഹിത്യവേദി

ഗവ. ഹയര്‍ സെക്കന്ററി സ്കൂള്‍ കമ്പല്ലൂര്‍

കാര്യപരിപാടി

സ്വാഗതം കുമാരി ഹര്‍ഷ ഗംഗാധരന്‍ സെക്രട്ടറി, സാഹിത്യവേദി

അധ്യക്ഷ കുമാരി അലീന ജോസഫ് പ്രസിഡന്റ് സാഹിത്യവേദി

അനുസ്മരണങ്ങള്‍

ജോര്‍ജ്ജ് ബര്‍ണാഡ്ഷാ ശ്രീ ശ്രീകാന്ത് സി

ജോസഫ് മുണ്ടശ്ശേരി ശ്രീമതി ലതാഭായി കെ ആര്‍

പ്രേംചന്ദ് ശ്രീമതി ബാലാമണി പി ബി

പൊന്‍കുന്നം വര്‍ക്കി ശ്രീ കെ പി ബൈജു

വൈക്കം മുഹമ്മദ് ബഷീര്‍ കുമാരി അമൃത ബി

പ്രഭാഷണം

എം ടിയുടെ ലോകങ്ങള്‍ ശ്രീ പത്മനാഭന്‍ പി

സ്വന്തം രചനകളുടെ അവതരണം

കഥ കുമാരി അശ്വതി ശശി

കവിത കുമാരി അമല തോമസ്

ലേഖനം കുമാരി നന്ദന കെ പി

കഥ കുമാരി ഷറഫിയ

കവിത കുമാരി അനശ്വര പി

വായനാനുഭവം

കുമാരി ശ്രീലക്ഷ്മി പി പി

കുമാരി ശ്രേയ

ആശംസാ പ്രസംഗങ്ങള്‍

ശ്രീ മാത്യു കെ ഡി

ശ്രീ പ്രവീണ്‍കുമാര്‍ പി ടി

ശ്രീമതി ഡെന്നീസ് കുര്യന്‍

ശ്രീമതി സിമി ജോസ്

ക്രോഡീകരണം ശ്രീ ബൈജു കെ പി

നന്ദി കുമാരി ദില്‍ന ടി കെ

Wednesday, July 25, 2018

ആദം പുസ്തകപരിചയം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ വിദ്യാരംഗം കലാ സാഹിത്യവേദിയുടെ ആഭിമുഖ്യത്തില്‍ കഴിഞ്ഞ വര്‍ഷം കൊല്ലാടയില്‍ ആരംഭിച്ച മാതൃകാഗ്രാമം വായനയിലൂടെ പദ്ധതിയുടെ തുടര്‍ പ്രവര്‍ത്തനങ്ങള്‍ ഈ വര്‍ഷവും തുടരുകയാണ്. അതിന്റെ ഭാഗമായി കൊല്ലാട ഇ എം എസ് പഠനകേന്ദ്രത്തിന്റെ സഹകരണത്തോടെ ഇന്ന് ( 25-07-2018ബുധനാഴ്ച) വൈകിട്ട് 4.30ന് കൊല്ലാടയില്‍ പ്രശസ്ത മലയാള കഥാകൃത്ത് എസ് ഹരീഷിന്റെ ആദം എന്ന ചെറുകഥാ സമാഹാരത്തെ അടിസ്ഥാനമാക്കി പുസ്തകപരിചയം നടത്തി. വെള്ളരിക്കുണ്ട് താലൂക്ക് ലൈബ്രറി കൗണ്‍സില്‍ പ്രസി‍ഡന്റ് പി കെ മോഹനന്‍ പരിപാടി ഉദ്ഘാടനം ചെയ്തു. തയ്യേനി ഗവ. ഹയര്‍ സെക്കന്ററി സ്കൂള്‍ മലയാളം അധ്യാപകന്‍ പി ആര്‍ സന്തോഷ് പുസ്തകപരിചയം നടത്തി. കമ്പല്ലൂര്‍ ഗവ. ഹയര്‍ സെക്കന്ററി സ്കൂള്‍ ഹെഡ്‌മാസ്റ്റര്‍ വി വി ഭാര്‍ഗ്ഗവന്‍ അധ്യക്ഷത വഹിച്ചു. വിദ്യാരംഗം കലാ സാഹിത്യവേദി കണ്‍വീനര്‍ കെ ആര്‍ ലതാഭായി, ഇ എം എസ് പഠനകേന്ദ്രം പ്രസിഡന്റ് എന്‍ വി ശിവദാസ് എന്നിവര്‍ ആശംസകളര്‍പ്പിച്ചു സംസാരിച്ചു. ഇ എം എസ് പഠനകേന്ദ്രം സെക്രട്ടറി കെ വി രവി സ്വാഗതവും മാതൃകാഗ്രാമം വായനയിലൂടെ പദ്ധതിയുടെ സംഘാടകസമിതി ചെയര്‍മാന്‍ കെ ദാമോദരന്‍ നന്ദിയും പറഞ്ഞു.

Thursday, July 19, 2018

ചാന്ദ്രപക്ഷാചരണം എച്ച് എസ്സ്

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ ഹൈസ്കൂള്‍ വിഭാഗത്തില്‍ സയന്‍സ് ക്ലബ്ബിന്റെ ഉദ്ഘാടനം ഏച്ചിലാംവയല്‍ ജനകീയ പ്ലാനറ്റോറിയത്തിന്റെ ഡയറക്ടര്‍ വെള്ളൂര്‍ ഗംഗാധരന്‍ മാസ്റ്റര്‍ നിര്‍വ്വഹിച്ചു. കെ പി രമേശന്‍, വി വി ഭാര്‍ഗ്ഗവന്‍, പി കെ സതീശന്‍ എന്നിവര്‍ സംസാരിച്ചു.

ചാന്ദ്രപക്ഷാചരണം എച്ച് എസ്സ് എസ്സ്

മനുഷ്യന്‍ ചന്ദ്രനിലെത്തിയതിന്റെ അന്‍പതാം വാര്‍ഷികാചരണത്തിന്റെ ഭാഗമായി സംഘടിപ്പിക്കുന്ന ചാന്ദ്രപക്ഷാചരണത്തിന്റെ ഭാഗമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ ഹയര്‍ സെക്കന്ററി വിഭാഗത്തില്‍ സയന്‍സ് ഫോറത്തിന്റെ ഉദ്ഘാടനം വെള്ളൂര്‍ ഗംഗാധരന്‍ മാസ്റ്റര്‍ നിര്‍വ്വഹിച്ചു. ഇന്നത്തെ കാലഘട്ടത്തില്‍ ശാസ്ത്രബോധം പുലരേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു. ചടങ്ങില്‍ കെ പി ബൈജു അധ്യക്ഷത വഹിച്ചു. കിഷോര്‍കുമാര്‍ ആര്‍, വി വി ഭാര്‍ഗ്ഗവന്‍ മാസ്റ്റര്‍, പ്രവീണ പി പി എന്നിവര്‍ ആശംസകളര്‍പ്പിച്ചു സംസാരിച്ചു. അജേഷ് കെ സ്വാഗതവും അലീനമൈക്കിള്‍ നന്ദിയും പറഞ്ഞു.

ചാന്ദ്ര പക്ഷാചരണം പോസ്റ്റര്‍

മുണ്ടശ്ശേരി ദിനാചരണം

മുണ്ടശ്ശേരി ദിനാചരണത്തിന്റെ ഭാഗമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ വിദ്യാരംഗം കലാ സാഹിത്യ വേദിയുടെ ആഭിമുഖ്യത്തില്‍ ക്ലാസ് റൂം പ്രവര്‍ത്തനങ്ങളുടെ ഭാഗമായി തയ്യാറാക്കിയ മുണ്ടശ്ശേരി അനുസ്മരണ പ്രഭാഷണം വിവിധക്ലാസുകളില്‍ നടത്തി. 9ബിയിലെ ആര്യ പി അനില്‍ നടത്തിയ പ്രഭാഷണത്തില്‍നിന്ന്...

പ്രീ പ്രൈമറി യൂണിഫോം വിതരണം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ പുതുതായി ആരംഭിച്ച പ്രീ- പ്രൈമറി ക്ലാസുകളിലെ കുട്ടികള്‍ക്ക് പി ടി എ നല്‍കുന്ന സൗജന്യ യൂണിഫോം പ്രിന്‍സിപ്പാള്‍ കെ ഡി മാത്യു മാസ്റ്റര്‍ വിതരണം ചെയ്തു. ചടങ്ങില്‍ കെ പി രമേശന്‍, കെ പി ബൈജു. പ്രമീള പി വി എന്നിവര്‍ സംസാരിച്ചു. അജിത ടീച്ചര്‍ സ്വാഗതം പറഞ്ഞു.