വായനക്കുട്ടായ്മ ഉദ്ഘാടനം

വായനയുടെ ലോകത്തേക്ക് കുട്ടികള്‍ക്കൊരു കൂട്ടായ്മ എന്ന സന്ദേശവമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂള്‍ വിവിധ ഗ്രന്ഥശാലകളുടെ സഹകരണത്തോടെ സംഘടിപ്പിക്കുന്ന അവധിക്കാല പരിപാടിയായ വായനക്കൂട്ടായ്മയ്ക്ക് ഔപചാരികമായ തുടക്കം കുറിച്ചു. ഓരോ ഗ്രന്ഥശാലകളുടേയും സമീപമുള്ള കുട്ടികള്‍ കൂട്ടായി പുസ്തകങ്ങളിലൂടെ അറിവിന്റേയും അനുഭൂതിയുടേയും മായികലോകത്തേക്ക് കടക്കുന്നതിനുള്ള പ്രവര്‍ത്തനമാണ് വായനക്കൂട്ടായ്മ. പുസ്തകങ്ങള്‍ വായിക്കുവാനും അതിനേക്കുറിച്ചുള്ള ചര്‍ച്ചകളില്‍ ഏര്‍പ്പെടുവാനും വായനക്കുറിപ്പുകള്‍ തയ്യാറാക്കുവാനും പൊതു സമൂഹത്തിനു മുന്നില്‍ തങ്ങളുടെ കാഴ്ചപ്പാടുകളും നിരീക്ഷണങ്ങളും അവതരിപ്പിക്കുവാനും ഈ പരിപാടി കുട്ടികള്‍ക്ക് അവസരം നല്‍കുന്നു. എല്ലാ ചൊവ്വാഴ്ചകളിലും ശനിയാഴ്ചകളിലും വൈകുന്നേരം 3 മണി മുതല്‍ 5.30 വരെയാണ് വായനക്കൂട്ടത്തിന്റെ സമയം. പ്രാദേശികമായി ചെറിയ മാറ്റങ്ങളുണ്ടാകും. കുട്ടികളെ വായനയില്‍ സഹായിക്കുവാനായി അധ്യാപകരും വായനശാലാ പ്രവര്‍ത്തകരും കൂടെ ഉണ്ടാകും. വായനക്കുറിപ്പുകള്‍ തയ്യാറാക്കുന്നതിലും അവയെ മെച്ചപ്പെടുത്തുന്നതിലും വേണ്ട നിര്‍ദ്ദേശങ്ങള്‍ അവര്‍ നല്‍കും. മെയ് 25ന് വായനക്കൂട്ടത്തിന്റെ സമാപനത്തിനു മുന്‍പായി ഒരു കുട്ടി 25 പുസ്തകങ്ങളെങ്കിലും വായിച്ച് പുസ്തകക്കുറിപ്പുകള്‍ ചേര്‍ത്ത് പതിപ്പു തയ്യാറാക്കണമെന്നാണ് പരിപാടിയുടെ ഭാഗമായി ലക്ഷ്യമിടുന്നത്. സ്കൂള്‍ തുറക്കുമ്പോള്‍ തങ്ങള്‍ തയ്യാറാക്കിയ വായനപ്പതിപ്പുമായാവും അവര്‍ വിദ്യാലയത്തിലെത്തുക. ഒപ്പം അവര്‍ സ്വയമേവ നടത്തിയ രചനകള്‍ ഉള്‍പ്പെടുന്ന ഒരു പതിപ്പും തയ്യാറാകും. ഓരോ ദിവസവും കുട്ടികള്‍ തയ്യാറാക്കുന്നവയില്‍ മികച്ച വായനക്കുറിപ്പുകള്‍ക്ക് സമ്മാനമുണ്ടാകും.

കമ്പല്ലൂരില്‍ സി ആര്‍ സി ആന്റ് ഗ്രന്ഥാലയത്തിലെ ബാലവേദിയും ബഡൂരില്‍ ഗ്രാമീണ വായനശാല ആന്റ് ഗ്രന്ഥാലയത്തിലെ ബാലവേദിയും കൊല്ലാട ഇ എം എസ് പഠനകേന്ദ്രം ആന്റ് ഗ്രന്ഥശാലയുമാണ് വിദ്യാലയത്തോടൊപ്പം പരിപാടിയില്‍ സഹസംഘാടകരാകുന്നത്. പ്രീ പ്രൈമറിയിലേയും ഒന്ന്, രണ്ട് ക്ലാസുകളിലെ കുട്ടികള്‍ക്കുമായി കഥകള്‍ പറഞ്ഞുകൊടുക്കാനും പാട്ടുകള്‍ ചൊല്ലിക്കൊടുക്കാനുമായി മുത്തശ്ശിക്കൂട്ടവും വായനക്കൂട്ടായ്മയുടെ ഭാഗമായി ഒരുക്കിയിട്ടുണ്ട്. മെയ് 11ന് കുട്ടികളോടൊപ്പം രക്ഷിതാക്കളും അധ്യാപകരും നാട്ടുകാരും പങ്കാളികളായി ജനകീയ വായനക്കൂട്ടം നടക്കും. ഗ്രന്ഥശാലകളില്‍ സംഘാടകസമിതികള്‍ രൂപീകരിച്ച് വായനക്കൂട്ടത്തെ സാംസാകാരികോല്‍സവമാക്കി മാറ്റാനുള്ള ഒരുക്കങ്ങള്‍ നടന്നുവരുന്നു.

കൊല്ലാട ഇ എം എസ് പഠനകേന്ദ്രം ആന്റ് ഗ്രന്ഥാലയത്തില്‍ വച്ചു നടന്ന പരിപാടിയില്‍ സി കെ രാധാകൃഷ്ണന്‍ മാസ്റ്റര്‍ ഉദ്ഘാടനം നിര്‍വ്വഹിച്ചു. കെ പി രമേശന്‍ മാസ്റ്റര്‍ അധ്യക്ഷത വഹിച്ചു. പി പത്മനാഭന്‍ പ്രവര്‍ത്തനപരിപാടികള്‍ വിശദീകരിച്ചു. കെ വി രവി നന്ദിയും കെ ദാമോദരന്‍ സ്വാഗതവും പറഞ്ഞു.

കമ്പല്ലൂര്‍ സി ആര്‍ സി ആന്റ് ഗ്രന്ഥാലയത്തില്‍ സന്തോഷ്‍കുമാര്‍ ചെറുപുഴ ഉദ്ഘാടനം ചെയ്തു. വി വി ഭാര്‍ഗവന്‍ മാസ്റ്റര്‍ അധ്യക്ഷത വഹിച്ചു. ലതാഭായി കെ ആര്‍ പ്രവര്‍ത്തനപരിപാടികള്‍ വിശദീകരിച്ചു. കെ ഗോവിന്ദന്‍ ആശംസകളര്‍പ്പിച്ച് സംസാരിച്ചു. കെ സി അനില്‍കുമാര്‍ സ്വാഗതവും മിനി സുഭാഷ് നന്ദിയും പറഞ്ഞു.

ബഡൂര്‍ ഗ്രാമീണവായനശാല ആന്റ് ഗ്രന്ഥാലയത്തില്‍ ജിതേഷ് കമ്പല്ലൂര്‍ ഉദ്ഘാടനകര്‍മ്മം നിര്‍വ്വഹിച്ചു. കെ എസ് ശ്രീനിവാസന്‍ അധ്യക്ഷത വഹിച്ചു. കെ പി ബൈജു പ്രവര്‍ത്തനപരിപാടികള്‍ വിശദീകരിച്ചു. സുജാത ആശംസകളര്‍പ്പിച്ചു സംസാരിച്ചു. കെ നാരായണന്‍ സ്വാഗതവും കെ പി അച്യുതന്‍ നന്ദിയും പറഞ്ഞു.

എല്ലാ കേന്ദ്രങ്ങളിലും കുട്ടികള്‍ വായനക്കുറിപ്പുകള്‍ അവതരിപ്പിച്ചു. വായനയ്ക്കുള്ള പുസ്തകങ്ങള്‍ വിതരണം ചെയ്തു. കമ്പല്ലൂര്‍, കൊല്ലാട കേന്ദ്രങ്ങളില്‍ ഏപ്രില്‍ 16ന് ചൊവ്വാഴ്ചയും ബഡൂരില്‍ ഏപ്രില്‍ 18ന് വ്യാഴാഴ്ചയും അടുത്ത വായനക്കൂട്ടം നടക്കും.

വായനക്കൂട്ടായ്മ പോസ്റ്റര്‍, നോട്ടീസ്

വായനയുടെ ലോകത്തേക്ക് കുട്ടികള്‍ക്കൊരു കൂട്ടായ്മ എന്ന സന്ദേശവമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂള്‍ വിവിധ ഗ്രന്ഥശാലകളുടെ സഹകരണത്തോടെ സംഘടിപ്പിക്കുന്ന അവധിക്കാല പരിപാടിയായ വായനക്കൂട്ടായ്മയ്ക്ക് നാളെ (13-04) ഔപചാരികമായി തുടക്കം കുറിക്കും. ഓരോ ഗ്രന്ഥശാലകളുടേയും സമീപമുള്ള കുട്ടികള്‍ കൂട്ടായി പുസ്തകങ്ങളിലൂടെ അറിവിന്റേയും അനുഭൂതിയുടേയും മായികലോകത്തേക്ക് കടക്കുന്നതിനുള്ള പ്രവര്‍ത്തനമാണ് വായനക്കൂട്ടായ്മ. പുസ്തകങ്ങള്‍ വായിക്കുവാനും അതിനേക്കുറിച്ചുള്ള ചര്‍ച്ചകളില്‍ ഏര്‍പ്പെടുവാനും വായനക്കുറിപ്പുകള്‍ തയ്യാറാക്കുവാനും പൊതു സമൂഹത്തിനു മുന്നില്‍ തങ്ങളുടെ കാഴ്ചപ്പാടുകളും നിരീക്ഷണങ്ങളും അവതരിപ്പിക്കുവാനും ഈ പരിപാടി കുട്ടികള്‍ക്ക് അവസരം നല്‍കുന്നു. എല്ലാ ചൊവ്വാഴ്ചകളിലും ശനിയാഴ്ചകളിലും വൈകുന്നേരം 3 മണി മുതല്‍ 5.30 വരെയാണ് വായനക്കൂട്ടത്തിന്റെ സമയം. കുട്ടികളെ വായനയില്‍ സഹായിക്കുവാനായി അധ്യാപകരും വായനശാലാ പ്രവര്‍ത്തകരും കൂടെ ഉണ്ടാകും. വായനക്കുറിപ്പുകള്‍ തയ്യാറാക്കുന്നതിലും അവയെ മെച്ചപ്പെടുത്തുന്നതിലും വേണ്ട നിര്‍ദ്ദേശങ്ങള്‍ അവര്‍ നല്‍കും. മെയ് 25ന് വായനക്കൂട്ടത്തിന്റെ സമാപനത്തിനു മുന്‍പായി ഒരു കുട്ടി 25 പുസ്തകങ്ങളെങ്കിലും വായിച്ച് പുസ്തകക്കുറിപ്പുകള്‍ ചേര്‍ത്ത് പതിപ്പു തയ്യാറാക്കണമെന്നാണ് പരിപാടിയുടെ ഭാഗമായി ലക്ഷ്യമിടുന്നത്. സ്കൂള്‍ തുറക്കുമ്പോള്‍ തങ്ങള്‍ തയ്യാറാക്കിയ വായനപ്പതിപ്പുമായാവും അവര്‍ വിദ്യാലയത്തിലെത്തുക. ഒപ്പം അവര്‍ സ്വയമേവ നടത്തിയ രചനകള്‍ ഉള്‍പ്പെടുന്ന ഒരു പതിപ്പും തയ്യാറാകും. ഓരോ ദിവസവും കുട്ടികള്‍ തയ്യാറാക്കുന്നവയില്‍ മികച്ച വായനക്കുറിപ്പുകള്‍ക്ക് സമ്മാനമുണ്ടാകും.

കമ്പല്ലൂരില്‍ സി ആര്‍ സി ആന്റ് ഗ്രന്ഥാലയത്തിലെ ബാലവേദിയും ബഡൂരില്‍ ഗ്രാമീണ വായനശാല ആന്റ് ഗ്രന്ഥാലയത്തിലെ ബാലവേദിയും കൊല്ലാട ഇ എം എസ് പഠനകേന്ദ്രം ആന്റ് ഗ്രന്ഥശാലയുമാണ് വിദ്യാലയത്തോടൊപ്പം പരിപാടിയില്‍ സഹസംഘാടകരാകുന്നത്. പ്രീ പ്രൈമറിയിലേയും ഒന്ന്, രണ്ട് ക്ലാസുകളിലെ കുട്ടികള്‍ക്കുമായി കഥകള്‍ പറഞ്ഞുകൊടുക്കാനും പാട്ടുകള്‍ ചൊല്ലിക്കൊടുക്കാനുമായി മുത്തശ്ശിക്കൂട്ടവും വായനക്കൂട്ടായ്മയുടെ ഭാഗമായി ഒരുക്കിയിട്ടുണ്ട്. ഏപ്രില്‍ 13ന് കൊല്ലാടയില്‍ സി കെ രാധാകൃഷ്ണന്‍ മാസ്റ്ററും കമ്പല്ലൂരില്‍ സന്തോഷ്‍കുമാര്‍ ചെറുപുഴയും ബഡൂരില്‍ ജിതേഷ് കമ്പല്ലൂരും പരിപാടിയുടെ ഉദ്ഘാടനം നിര്‍വ്വഹിക്കും. ഏപ്രില്‍ 27, മെയ് 11 തീയ്യതികളില്‍ കുട്ടികളോടൊപ്പം രക്ഷിതാക്കളും അധ്യാപകരും നാട്ടുകാരും പങ്കാളികളായി ജനകീയ വായനക്കൂട്ടം നടക്കും. ഗ്രന്ഥശാലകളില്‍ സംഘാടകസമിതികള്‍ രൂപീകരിച്ച് വായനക്കൂട്ടത്തെ ഒരു സാംസാകാരികോല്‍സവമാക്കി മാറ്റാനുള്ള ഒരുക്കങ്ങള്‍ നടന്നുവരുന്നു.

ഫുട്ബോള്‍ കോച്ചിംഗ് ക്യാമ്പ് ഉദ്ഘാടനം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിന്റെ നേതൃത്വത്തില്‍ സംഘടിപ്പിക്കുന്ന ഫുട്ബോള്‍ പരിശീലനക്യാമ്പിനു തുടക്കമായി. സ്കൂള്‍ മൈതാനത്തു ന‌ടന്ന ‌ചടങ്ങില്‍ പ്രിന്‍സിപ്പാള്‍ ശ്രീ കെ ഡി മാത്യു പരിശീലനം ഉദ്ഘാടനം ചെയ്തു. ഹെഡ്‌മാസ്റ്റര്‍ ശ്രീ വി വി ഭാര്‍ഗവന്‍ അധ്യക്ഷത വഹിച്ചു. പരി‍ശീലകന്‍ ടി വി ഗിരീഷ് സംസാരിച്ചു. കെ പി ബൈജു സ്വാഗതം പറഞ്ഞു. നാളെ (12-04) മുതല്‍ രാവിലെ 6.30 മുതല്‍ 8.30 വരെയായിരിക്കും പരിശീലനസമയം. പരിശീലനപരിപാടിക്ക് പേരു രജിസ്റ്റര്‍ ചെയ്ത എല്ലാ കുട്ടികളും കൃത്യസമയത്തുതന്നെ എത്തിച്ചേരേണ്ടതാണ് എന്ന് കോഡിനേറ്റര്‍ അറിയിക്കുന്നു.

നീന്തല്‍ പരിശീലനം 7-4-2019

നീന്തല്‍ പരിശീലനം തുടരുന്നു. ഇ എം എസ് പഠനകേന്ദ്രം ആന്റ് ലൈബ്രറിയുടെ നേതൃത്വത്തില്‍ കൊല്ലാടയിലും കുടുംബശ്രീ യൂണിറ്റുകളുടെ നേതൃത്വത്തില്‍ തുരുന്തി കടവിലും നടക്കുന്ന പരിശീലനങ്ങള്‍ ഏകോപിപ്പിക്കുന്നത് കമ്പല്ലൂര്‍ ഗവ. ഹയര്‍ സെക്കന്ററി സ്കൂളാണ്. ഏപ്രില്‍ 7ന് രണ്ടു കേന്ദ്രങ്ങളിലായി അന്‍പതോളം കുട്ടികള്‍ പരിശീലനം നേടി. ഏപ്രില്‍ 14ന് ഞായറാഴ്ച പരിശീലനം ഉണ്ടായിരിക്കുന്നതല്ല.

വായനക്കൂട്ടായ്മ വാര്‍ത്ത 1

ദേശാഭിമാനി 10-04-2019

ഫുട്ബോള്‍ കോച്ചിംഗ് ക്യാമ്പ്

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ ഫുട്ബോള്‍ കോച്ചിംഗ് ക്യാമ്പ് ഏപ്രില്‍ 11ന് ബുധനാഴ്ച ആരംഭിക്കും. കോച്ചിംഗ് ക്യാമ്പിലേക്ക് പേരു രജിസ്റ്റര്‍ ചെയ്തിട്ടുള്ള കുട്ടികള്‍ അന്നേദിവസം വൈകുന്നേരം 4 മണിക്ക് സ്കൂള്‍ ഗ്രൗണ്ടില്‍ എത്തിച്ചേരേണ്ടതാണ്. സബ്‍ജൂനിയര്‍, ജൂനിയര്‍, സീനിയര്‍ വിഭാഗങ്ങളിലായി സ്കൂള്‍തല ഫുട്ബോള്‍ ടീമിനെ പരിശീലിപ്പിക്കുവാനാണ് ക്യാമ്പിലൂടെ ലക്ഷ്യമിടുന്നത്. സ്കൂള്‍തല ടീമില്‍ ഉണ്ടാകണമെന്ന് ആഗ്രഹിക്കുന്ന എല്ലാ കുട്ടികളും നിര്‍ബന്ധമായും പരിശീലനത്തില്‍ പങ്കെടുക്കേണ്ടതാണ്. നിലവില്‍ രജിസ്റ്റര്‍ ചെയ്യാത്തവര്‍ക്കും പങ്കെടുക്കാം. കമ്പല്ലൂര്‍ സ്കൂളിലെ അഞ്ചാം ക്ലാസുമുതലുള്ള കുട്ടികളെയാണ് പരിശീലനത്തില്‍ പങ്കെടുപ്പിക്കുക. ഹയര്‍ സെക്കന്ററി വിഭാഗം കുട്ടികളും പരിശീലനത്തില്‍ പങ്കെടുക്കേണ്ടതാണ്.

കൂടുതല്‍ വിവരങ്ങള്‍ക്ക് Contact: 9605671582

9605868752

വായനക്കൂട്ടായ്മ

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിന്റെ നേതൃത്വത്തില്‍ വിവിധ ഗ്രന്ഥാലയങ്ങളുടെ സഹകരണത്തോടെ ഈ അവധിക്കാലത്തു നടക്കുന്ന വായനക്കൂട്ടായ്മയ്ക്ക് ഏപ്രില്‍ 10ന് ബുധനാഴ്ച തുടക്കമാകുകയാണ്. വിദ്യാലയത്തിനു സമീപമുള്ള നാലു കേന്ദ്രങ്ങളിലായി എല്ലാ കുട്ടികളും കൂട്ടായി പുസ്തകങ്ങളുടെ വിശാലമായ ലോകത്തിലേക്കു കടക്കാനുള്ള പ്രവര്‍ത്തനമായാണ് വായനക്കൂട്ടായ്മ വിഭാവനം ചെയ്തിട്ടുള്ളത്. വിദ്യാര്‍ത്ഥികള്‍ അവര്‍ക്ക് ഏറ്റവും അടുത്തുള്ള കേന്ദ്രത്തില്‍ വൈകുന്നേരം 3 മണിക്ക് എത്തിച്ചേരേണ്ടതാണ്. ഒരു നോട്ടുപുസ്തകവും പേനയും കയ്യില്‍ കരുതേണ്ടതാണ്.

സി ആര്‍ സി ആന്റ് ഗ്രന്ഥശാല, കമ്പല്ലൂര്‍

ഇ എം എസ് പഠനകേന്ദ്രം ആന്റ് ലൈബ്രറി, കൊല്ലാട

ഗ്രാമീണവായനശാല, ബഡൂര്‍

ഗവ. എല്‍ പി സ്കൂള്‍, മൗക്കോട്

എന്നിവയാണ് നിശ്ചയിക്കപ്പെട്ടിട്ടുള്ള കേന്ദ്രങ്ങള്‍. കൊല്ലാട ഒഴികെയുള്ള എല്ലാ കേന്ദ്രങ്ങളിലും ഏപ്രില്‍ 10ന് ബുധനാഴ്ച വൈകുന്നേരം 3 മണിക്ക് വായനക്കൂട്ടായ്മ ആരംഭിക്കും. കൊല്ലാടയില്‍ ഏപ്രില്‍ 11ന് വ്യാഴാഴ്ച വൈകിട്ട് 3 മണിക്കാണ് കുട്ടികള്‍ എത്തിച്ചേരേണ്ടത്. തുടര്‍ന്നുള്ള ആഴ്ചകളില്‍ കൊല്ലാട ഒഴികെയുള്ള കേന്ദ്രങ്ങളില്‍ എല്ലാ ബുധനാഴ്ചകളിലും ശനിയാഴ്ചകളിലും കൊല്ലാടയില്‍ എല്ലാ ചൊവ്വാഴ്ചകളിലും ശനിയാഴ്ചകളിലുമായിരിക്കും വായനക്കൂട്ടായ്മ നടക്കുക. കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ പ്രീ പ്രൈമറി മുതല്‍ 9ാം ക്ലാസുവരെ പഠിക്കുന്ന എല്ലാ കുട്ടികളും മേല്‍പറഞ്ഞ നാലുകേന്ദ്രങ്ങളിലൊന്നില്‍ നിര്‍ബന്ധമായും പങ്കെടുക്കേണ്ടതാണ്. പരിപാടിയുടെ ഔപചാരികമായ ഉദ്ഘാടനം ഏപ്രില്‍ 12ന് ശനിയാഴ്ച വൈകിട്ട് 3.30ന് ഓരോ കേന്ദ്രങ്ങളിലും നടക്കുന്നതാണ്. അതിനുമുന്‍പായി ഓരോ കുട്ടിയും ചെയ്യേണ്ട പ്രവര്‍ത്തനങ്ങള്‍ ഏപ്രില്‍ 10, 11 തീയ്യതികളിലായി നടക്കുന്ന വായനക്കൂട്ടായ്മയിലുണ്ടാകും.

ഫുട്ബോള്‍ കോച്ചിംഗ് ക്യാമ്പ്

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിന്റെ നേതൃത്വത്തില്‍ കുട്ടികള്‍ക്കുള്ള ഫുട്ബോള്‍ കോച്ചിംഗ് ക്യാമ്പ് ഏപ്രില്‍ 11 ന് ആരംഭിക്കുകയാണ്. സ്കൂള്‍ തലത്തില്‍ ജൂനിയര്‍, സീനിയര്‍ വിഭാഗങ്ങളിലായി മികച്ച ഫുട്ബോള്‍ ടീമുകളെ സജ്ജമാക്കുവാനാണ് പരിശീലനത്തിലൂടെ ലക്ഷ്യമിടുന്നത്. എഴുപത്തിയഞ്ചോളം കുട്ടികള്‍ ക്യാമ്പില്‍ പങ്കെടുക്കും. പ്രാദേശികമായി ലഭ്യമായ പരിശീലകരുടേയും ക്ഷണിക്കപ്പെട്ട വിദഗ്ദ്ധരുടേയും സഹായത്തോടെയാവും ക്യാമ്പു നടക്കുക. 15 ദിവസം പരിപാടി തുടരും. നിലവില്‍ നമ്മുടെ വിദ്യാലയത്തില്‍ ഒരു മുഴുവന്‍ സമയ കായികാധ്യാപകനില്ലാത്തത് ഇത്തരം കാര്യങ്ങള്‍ നടത്തുന്നതില്‍ വലിയ പരിമിതിയാണ്.

ക്യാമ്പിന്റെ നടത്തിപ്പിന് വലിയ ചെലവു വരുന്നുണ്ട്. പ്രധാനമായും നാല്‍പ്പതോളം പന്തുകള്‍ വേണം. എല്ലാ കുട്ടികള്‍ക്കും ബിബുകള്‍ വേണം. ഇതൊക്കെ കണ്ടെത്തേണ്ടത് ഭാരിച്ച ഒരു ഉത്തരവാദിത്തമായി മാറിയിട്ടുണ്ട്. ഇക്കാര്യത്തില്‍ എല്ലാവരുടേയും സഹകരണങ്ങള്‍ തേടുന്നു. ക്യാമ്പിലേക്കാവശ്യമായ പന്തുകളും മറ്റും സംഭാവന നല്‍കാന്‍ സുമനസ്സുകളായ സുഹൃത്തുക്കള്‍ തയ്യാറാകണമെന്ന് അഭ്യര്‍ത്ഥിക്കുന്നു. നമ്മുടെ സ്കൂളില്‍ മികച്ച ഒരു ഫുട്ബോള്‍ ടീമിനെ സൃഷ്ടിച്ചെടുക്കാന്‍ എല്ലാവരും സഹായവുമായി മുന്നിട്ടിറങ്ങുമെന്നു പ്രതീക്ഷിക്കട്ടെ.

നിങ്ങള്‍ക്ക് നേരിട്ടു ചെയ്യാന്‍ പറ്റുന്നതോ മറ്റ് ഏജന്‍സികളേക്കൊണ്ട് ചെയ്യിക്കാന്‍ കഴിയുന്നതോ ആയ സഹായങ്ങള്‍ ഈ പോസ്റ്റിനോടുള്ള കമന്റായി പോസ്റ്റുചെയ്യുമല്ലോ. അല്ലാതെയുള്ള ലൈക്കുകളും ഷെയറുകളും കൊണ്ട് കാര്യമൊന്നുമില്ല എന്നുകൂടി ഓര്‍മ്മിപ്പിക്കട്ടെ. എല്ലാ പൂര്‍വ്വ വിദ്യാര്‍ത്ഥികളുടേയും കായികപ്രേമികളുടേയും ഇടപെടലുകള്‍ പ്രതീക്ഷിക്കുന്നു.

ടാലന്റ് ലാബ് അവധിക്കാല പരിശീലനം

ടാലന്റ് ലാബിന്റെ പ്രവര്‍ത്തനങ്ങലുടെ ഭാഗമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ വിവിധങ്ങളായ പ്രവര്‍ത്തിപരിചയ പരിചയമേഖലകളില്‍ പരിശീലനം നല്‍കി. വേസ്റ്റ് മെറ്റീരിയലുകള്‍ ഉപയോഗിച്ചുള്ള ഉല്‍പ്പന്ന നിര്‍മ്മാണം, എംബ്രോയിഡറി, ഫാബ്രിക് പെയിന്റിംഗ്, പേപ്പര്‍ ക്രാഫ്റ്റ്, ഫയല്‍ മേക്കിംഗ്, ചന്ദനത്തിരി നിര്‍മ്മാണം, ചോക്ക് നിര്‍മ്മാണം, പാവ നിര്‍മ്മാണം തുടങ്ങിയ മേഖലകളിലാണ് പരിശീലനം നല്‍കിയത്. പ്രിന്‍സി റോഷന്‍, റോഷിയ മരിയ റോഷന്‍, ദീതുല്‍ ദിനേശ്, ജോളി, ആര്യ പി അനില്‍, ചിത്ര, ലതാഭായി കെ ആര്‍ എന്നിവര്‍ പരിശീലനത്തിന് നേതൃത്വം നല്‍കി. തുടര്‍ച്ചയായ പരിശീലനങ്ങളിലൂടെ അവധിക്കാലത്തുതന്നെ കുട്ടികളെ നിര്‍മ്മാണ പ്രവര്‍ത്തനങ്ങളില്‍ മികവുള്ളവരാക്കി മാറ്റാനാണ് ടാലന്റ് ലാബിന്റെ പ്രവര്‍ത്തനങ്ങളിലൂടെ ലക്ഷ്യമിടുന്നത്. അടുത്ത വര്‍ക്ക്‌ഷോപ്പ് മെയ് മാസത്തില്‍ നടക്കും.