lkr yuvasakthi award

ആയന്നൂര്‍ യുവശക്തി പബ്ലിക്ക് ലൈബ്രറി ഏര്‍പ്പെടുത്തിയ ഈ വര്‍ഷത്തെ മാത്യു മാഞ്ഞൂര്‍ പുരസ്കാരം കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ കെ ആര്‍ ലതാഭായി ടീച്ചറിന് കിട്ടുമ്പോള്‍ അത് ആര്‍ഹതയ്ക്കുള്ള അംഗീകാരമാകുന്നുവെന്ന് നിസ്സംശയം പറയാം. ഒപ്പം ഈ അംഗീകാരം കമ്പല്ലൂര്‍ ഗവ. ഹയര്‍ സെക്കന്ററി സ്കൂളിനു കൂടിയാണെന്ന് പറയാതിരിക്കാന്‍ വയ്യ. അതാണ് വിദ്യാലയ പ്രവര്‍ത്തനങ്ങളിലെ കമ്പല്ലൂര്‍ കൂട്ടായ്മ.

1998ലാണ് ലതാഭായി ടീച്ചര്‍ കമ്പല്ലൂര്‍ സ്കൂളിലെത്തുന്നത്. അന്ന് ഒന്നാം ക്ലാസ് ഒന്നാംതരമാക്കിയാണ് ടീച്ചര്‍ തുടങ്ങിയത്. പുതിയ പാഠ്യപദ്ധതിയും പഠനരീതികളും ആകെ ആബദ്ധമാണെന്ന് പലരും പറഞ്ഞപ്പോള്‍ അതിലെ ശരികളെ കണ്ടെത്താനും സാധ്യതകള്‍ തിരിച്ചറിയാനും പുതിയ മാതൃകകള്‍ സൃഷ്ടിക്കുവാനും ടീച്ചര്‍ക്കായി.

2005ല്‍ മലയാളം HSA ആയി ഇവിടെ തന്നെ ടീച്ചര്‍ക്ക് നിയമനം ലഭിച്ചു. 1998 മുതല്‍ ഇന്നുവരെ 20 വര്‍ഷക്കാലം നീണ്ട സേവന കാലയളവില്‍ ഈ വിദ്യാലയത്തില്‍ ടീച്ചറുടെ കൈയെത്താത്ത ഇടങ്ങളുണ്ടാകില്ല. 2011ല്‍ ജൂനിയര്‍ റെഡ്ക്രോസിന്റെ ചുമതലയേല്‍ക്കുന്നതിലൂടെ സാമൂഹിക സേവനപ്രവര്‍ത്തനങ്ങളുടെ മേഖലയിലേക്ക് വലിയൊരു സാധ്യത ടീച്ചര്‍ക്ക് തുറന്നു ലഭിക്കുകയായിരുന്നു.

വിദ്യാലയത്തിന്റെ ശുചിത്വം നിലനിര്‍ത്തുന്നതില്‍ ഈ കാലയളവില്‍ ജെ ആര്‍ സി ചെയ്ത പ്രവര്‍ത്തനങ്ങളും അതിന് ടീച്ചര്‍ നല്‍കിയ പ്രത്യേക ശ്രദ്ധയും പറയാതെ പോകാനാകില്ല. ഗ്രാമശുചിത്വത്തിനായി നടത്തുന്ന പ്രവര്‍ത്തനങ്ങളിലും പ്ലാസ്റ്റിക് വിരുദ്ധ ക്യാമ്പെയിനിലും സജീവമായി പ്രവര്‍ത്തിച്ചു വരുന്നു. പേപ്പര്‍ ബാഗ് നിര്‍മ്മാണവും അവയുടെ പ്രചാരണവും ഇതിന്റെ ഭാഗമായി എല്ലാ വര്‍ഷവും നടത്തിവരുന്നു. കമ്പല്ലൂര്‍ സ്കൂളിന്റെ നേതൃത്വത്തില്‍ വര്‍ഷങ്ങളായി നടന്നു വരുന്ന പാലിയേറ്റീവ് പ്രവര്‍ത്തനങ്ങള്‍ക്ക് നേതൃത്വം നല്‍കന്നത് ടീച്ചറാണ്. വിദ്യാലയത്തിനു സമീപമുള്ള പ്രദേശങ്ങളിലെ ഇരുപത്തിനാലോളം വീടുകളില്‍ എല്ലാ രണ്ടാം ശനിയാഴ്ചകളിലും പാലിയേറ്റീവ് സംഘങ്ങളെത്തുന്നു. വിദ്യാലയ പച്ചക്കറി കൃഷി വളരെ ഭംഗിയായി നടത്തുന്നതിനും കൃഷി ഒരു സംസ്കാരമാണെന്ന് കുട്ടികളെ ബോധ്യപ്പെടുത്തുന്നതിനും ജെ ആര്‍ സിയിലൂടെ ടീച്ച‍ര്‍ക്കു കഴിഞ്ഞിട്ടുണ്ട്. സ്വാശ്രയത്വ ശീലവുമായി ബന്ധപ്പെട്ട് സോപ്പും ലോഷനും നിര്‍മ്മിക്കുന്നതിനും അവ പ്രചരിപ്പിക്കുന്നതിനും സോപ്പു നിര്‍മ്മാണ പരിശീലകയായി പ്രവര്‍ത്തിക്കുന്നതിനും ടീച്ചര്‍ക്ക് മുന്നിലുണ്ട്. പ്രവര്‍ത്തനങ്ങള്‍ ഓരോന്നായി ഇങ്ങനെ എണ്ണിയെണ്ണി പറഞ്ഞാല്‍ തീരില്ല. അത്രയ്ക്കുണ്ട് അവ.

ചിറ്റാരിക്കല്‍ ഉപജില്ലാ വിദ്യാരംഗം കണ്‍വീനറായി വര്‍ഷങ്ങളുടെ പ്രവര്‍ത്തന മികവ് എടുത്തു പറയേണ്ടതാണ്. കമ്പല്ലൂര്‍ സ്കൂളില്‍ കുട്ടികളില്‍ സാഹിത്യാഭിരുചി വളര്‍ത്താനായി നടത്തിയ നിരവധി പ്രവര്‍ത്തനങ്ങളുണ്ട്. മാതൃകാ ഗ്രാമം വായനയിലൂടെ എന്നത് പ്രാദേശികതലത്തില്‍ വായനാശീലം വളര്‍ത്താനുള്ള വേറിട്ട ഒരു ശ്രമമായിരുന്നു. വിദ്യാലയത്തിന്റെ നേതൃത്വത്തില്‍ പ്രാദേശികസമിതികളിലൂടെ ജനകീയ ബന്ധം ഉറപ്പിക്കാനായി നടത്തിയ പ്രവര്‍ത്തനങ്ങളിലും ടീച്ചര്‍ നേതൃത്വപരമായ പങ്ക് വഹിച്ചിട്ടുണ്ട്.

കമ്പല്ലൂര്‍ സ്കൂളില്‍ വച്ച് എറ്റവും ഒടുവില്‍ നടത്തിയ ഉപജില്ലാ സ്കൂള്‍ കലോല്‍സവത്തിന്റെ പ്രോഗ്രാം കമ്മറ്റി കണ്‍വീനര്‍ ടീച്ചറായിരുന്നു. ആദ്യമായിട്ടായിരിക്കും നമ്മുടെ ഉപജില്ലയില്‍ ഒരു വനിത പ്രോഗ്രാം കമ്മറ്റിയെ നയിക്കുന്നത്. 2012ല്‍ നല്ലപാഠം പ്രവര്‍ത്തനങ്ങളുടെ ഭാഗമായി കാസറഗോഡ് ജില്ലയിലെ മികച്ച വിദ്യാലയമായി കമ്പല്ലൂരും മികച്ച കോഡിനേറ്ററായി ലതാഭായി ടീച്ചറും തെരഞ്ഞെടുക്കപ്പെട്ടു. വര്‍ഷങ്ങളായി ജില്ലയിലെ ഏറ്റവും മികച്ച ജെ ആര്‍ സി യൂണിറ്റായി നമ്മുടെ വിദ്യാലയം തെരഞ്ഞെടുക്കപ്പെട്ടുകൊണ്ടേയിരിക്കുകയാണ്.

ജെ ആര്‍ സിയും എന്‍ എസ് എസും സ്കൗട്ടും ഗൈ‍ുഡുകളും കൂടി ചേര്‍ന്ന് നടത്തുന്ന സാമൂഹിക സേവന പ്രവര്‍ത്തനങ്ങളുടെ ശൃംഖലയാണ് കമ്പല്ലൂര്‍ സ്കൂളിന്റെ പ്രത്യേകത. പ്രധാന പ്രവര്‍ത്തനങ്ങളുടെ ആസൂത്രണത്തിലും നിര്‍വ്വഹണത്തിലും ഈ കൂട്ടായ്മ നിനനിര്‍ത്തിക്കൊണ്ടുപോകുവാന്‍ എക്കാലവും എല്ലാ പ്രധാനാധ്യാപകരും ഇവിടെ ശ്രദ്ധിച്ചിട്ടുണ്ട്. ആ കൂട്ടായ്മയില്‍ ഒരു അംഗമായി നിന്നുകൊണ്ട് കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ മറ്റെല്ലാ സഹപ്രവര്‍ത്തകരേയും പോലെ ഞാനും ലതാഭായി ടീച്ചര്‍ക്കു ലഭിച്ച ഈ അംഗീകാരത്തിലും പുരസ്കാരലബ്ധിയിലും സന്തോഷിക്കുകയും അഭിമാനിക്കുകയും ചെയ്യുന്നു.

കെ പി ബൈജു

സ്റ്റാഫ് സെക്രട്ടറി

ഗവ. ഹയര്‍ സെക്കന്ററി സ്കൂള്‍ കമ്പല്ലൂര്‍

ആക്കോക്കാവ് ശുചീകരണം

പച്ചപ്പിന്റെ അവശേഷിക്കുന്ന തുരുത്തുകളായ കാവുകളുടെ സംരക്ഷണത്തിന് കുട്ടികളുടെ കൂട്ടായ്മ. കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ എന്‍ എസ് എസ് യൂണിറ്റാണ് പാരിസ്ഥിതികം പദ്ധതിയുടെ ഭാഗമായി കമ്പല്ലൂരിലെ ആക്കോക്കാവ് ശുചീകരിച്ചത്. കാവിലും കാവിലൂടെ ഒഴുകുന്ന തോട്ടിലും അടിഞ്ഞുകൂടിയ ചാക്കു കണക്കിന് പ്ലാസ്റ്റിക് മാലിന്യങ്ങള്‍ കുട്ടികള്‍ ശേഖരിച്ചു. അവയില്‍ റീസൈക്കിള്‍ ചെയ്യാവുന്നവ കഴുകി വൃത്തിയാക്കി കൈമാറുകയും ബാക്കിയുള്ളവ നീക്കം ചെയ്യുകയും ചെയ്തു. കുപ്പികളും പ്ലാസ്റ്റിക് കൂടുകളും അടിഞ്ഞുകൂടി സ്വാഭാവിക പരിസ്ഥിതി നഷ്ടമാകുന്ന കാടുകളുടെ സംരക്ഷണം ഏറെ പ്രധാനമാണെന്ന് സംഘം വിലയിരുത്തി.

ഗ്രാമപഞ്ചായത്ത് അംഗം കെ പി മാത്യു ശുചീകരണ പ്രവര്‍ത്തകരെ അഭിസംബോധനചെയ്ത് സംസാരിച്ചു. എന്‍ എസ് എസ് പ്രോഗ്രാം ഓഫീസര്‍ കെ വി സജി, ജെയിംസ് ഇമ്മാനുവേല്‍, രാജേഷ് കെ ഒ, രജീഷ് രാജന്‍, അലീന മൈക്കിള്‍, കെ പി ബൈജു എന്നിവര്‍ സംസാരിച്ചു. അടുത്ത മഴക്കാലത്തിനു മുന്‍പ് ഗ്രാമത്തിലെ എല്ലാ ജലസ്രോതസ്സുകളും ജനപങ്കാളിത്തത്തോടെ ശുചീകരിക്കാനാവശ്യമായ മുന്നൊരുക്കങ്ങള്‍ തുടങ്ങണമെന്ന് വളണ്ടിയര്‍മാരുടെ യോഗം തീരുമാനിച്ചു.

തേജസ്വിനി പുഴ ശുചീകരണം

കമ്പല്ലൂര്‍ ഗവ.ഹയര്‍ സെക്കന്ററി സ്കൂളിലെ എന്‍ എസ് എസ് യൂണിറ്റിന്റെ നേതൃത്വത്തില്‍ തേജസ്വിനി പുഴയോരം ശുചീകരിച്ചു. പുഴയോരത്ത് അടിഞ്ഞുകൂടിയ മാലിന്യങ്ങള്‍ നീക്കം ചെയ്തു. വലിച്ചെറിഞ്ഞ പ്ലാസ്റ്റിക് ബോട്ടിലുകളും കുപ്പികളും ശേഖരിച്ച് കഴുകി വൃത്തിയാക്കി റീ സൈക്ലിംഗിന് നല്‍കി. ചാക്കുകണക്കിനു മാലിന്യങ്ങളാണ് നീക്കം ചെയ്തത്. നെടുംകല്ല് പാലവും പരിസരപ്രദേശങ്ങളിലുമാണ് ശുചീകരണ പ്രവര്‍ത്തനങ്ങള്‍ നടന്നത്. പാലത്തിനടിയില്‍ നടക്കുന്ന മദ്യപാനവും മറ്റു സാമൂഹ്യവിരുദ്ധ പ്രവര്‍ത്തനങ്ങളും നിര്‍ത്തലാക്കാന്‍ നടപടികളുണ്ടാകണമെന്ന് വളണ്ടിയര്‍മാര്‍ ആവശ്യപ്പെട്ടു. സമാനമായ രീതിയില്‍ ഒരു ബൃഹദ് യജ്ഞത്തിലുടെ കമ്പല്ലൂരിലെ ആക്കച്ചേരി റിസര്‍വ്വ് വനവും കമ്പല്ലൂര്‍ സ്കൂളിലെ കുട്ടികള്‍ പൊതുജനങ്ങളുടെ സഹകരണത്തോടെ ശുചീകരിച്ചിരുന്നു. കാലാനസ്ഥാ വ്യതിയാന വകുപ്പിന്റെ പാരിസ്ഥിതികം പദ്ധതിയുടെ ഭാഗമായാണ് പ്രവര്‍ത്തനങ്ങള്‍ നടന്നത്.

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ സീനീയര്‍ അധ്യാപകന്‍ ജെയിംസ് ഇമ്മാനുവേല്‍ ശുചീകരണ പ്രവര്‍ത്തനങ്ങള്‍ ഉദ്ഘാടനം ചെയ്തു. എന്‍ എസ് എസ് പ്രോഗ്രാം ഓഫീസര്‍ സജി കെ വി, സ്റ്റാഫ് സെക്രട്ടറി ബൈജു കെ പി, വളണ്ടിയര്‍ ക്യാപ്റ്റന്‍മാരായ രജീഷ് രാജന്‍, അലീന മൈക്കിള്‍ എന്നിവര്‍ നേതൃത്വം നല്‍കി. 35 വളണ്ടിയര്‍മാര്‍ പ്രവര്‍ത്തനത്തില്‍ അണിചേര്‍ന്നു.