GHSS KAMBALLUR ; Email:prncplkmbllur@gmail.com ; Ph.No.04672220870

OUR MESSAGE

കമ്പല്ലൂര്‍ ഗവ. ഹയര്‍ സെക്കണ്ടറി സ്കൂള്‍ ജൂബിലി ഉദ്ഘാടന വേളയില്‍ അവതരിപ്പിച്ച റിപ്പോര്‍ട്ട് : അറിവ് അഗ്നിയാണ്‌. അറിവിന്റെ പൊള്ളല്‍ സുഖകരമായ അനുഭവമാണ്‌. അറിവിനുവേണ്ടിയുള്ള ഒരു ജനതയുടെ സ്വപ്നങ്ങളുടെ സാക്ഷാത്കാരമാണ്‌ കമ്പല്ലൂര്‍ ഗവ: ഹയര്‍ സെക്കന്ററി സ്കൂള്‍. മലബാര്‍ ഡിസ്ട്രിക്ട് ബോര്‍ഡിന്റെ അനുമതിയോടെ ഏകാധ്യാപക വിദ്യാലയമായി ഔപചാരികമായി 1954 മുതല്‍ പ്രവര്‍ത്തനമാരംഭിച്ച ഈ വിദ്യാലയത്തിന്‌ അതിനുമേറെ പഴക്കമുള്ള അക്ഷരസ്നേഹത്തിന്റെ ചരിത്രമുണ്ട്. 1939ൽ ശ്രീ നല്ലൂര്‍ ഗോവിന്ദന്‍ നായരുടെ നേതൃത്വത്തില്‍ ആരംഭിച്ച എഴുത്താശാന്‍ കളരിമുതല്‍ ഈ ചരിത്രം ആരംഭിക്കുന്നു. തുടര്‍ന്ന് ചില കാലയളവുകളില്‍ മുടങ്ങിയും വീണ്ടും തുടങ്ങിയും മുന്നോട്ടു നീങ്ങിയ കമ്പല്ലൂരിലെ കുടിപ്പള്ളിക്കൂടത്തിനുപിന്നില്‍ നിസ്വാര്‍ത്ഥരായ ഒരുകൂട്ടം ഗ്രാമീണമനുഷ്യരുടെ ത്യാഗനിര്‍ഭരമായ സേവനങ്ങളുടെയും യാതനകളുടേയും നീണ്ടകഥകളുണ്ട്. ഔപചാരിക കാലഘട്ടത്തിനു മുന്‍പ് എഴുത്താശാന്മാരായി സേവനമനുഷ്ടിച്ച സര്‍വ്വശ്രീ മരാര്‍ കുഞ്ഞിരാമന്‍ , ആമന്തറ കൃഷ്ണന്‍ നായര്‍, പാലാട്ട് ശങ്കരന്‍അടിയോടി എന്നിവരുടെ സേവനങ്ങള്‍ ഈ അവസരത്തില്‍ ആദരപൂര്‍വ്വം അനുസ്മരിക്കുന്നു. ഒപ്പം ആദ്യകാലഘട്ടത്തിലെ വിദ്യാലയ നിര്‍മ്മാണപ്രവര്‍ത്തനങ്ങള്‍ക്ക് നേതൃത്വപരമായ പങ്കു വഹിച്ച സര്‍വ്വശ്രീ നല്ലൂര്‍ ഗോവിന്ദന്‍ നായര്‍, മാവില കമ്മാരന്‍നായര്‍, കൈപ്രവന്‍ കൃഷ്ണന്‍ നായര്‍, നല്ലുര്‍ കുഞ്ഞിക്കണ്ണന്‍ നായര്‍, പാറപ്പുറത്ത് മമ്മു, പെരിന്തട്ട പറ്റിഞ്ഞാറേ വീട്ടില്‍ കണ്ണന്‍, വടക്കേ വീട്ടില്‍ അച്ചു, കൈപ്രവന്‍ കുഞ്ഞപ്പന്‍നായര്‍, തെങ്ങുംതറ കൃഷ്ണപൊതുവാള്‍, സി വി കുഞ്ഞമ്പു, സി പി കുഞ്ഞിക്കണ്ണന്‍ നായര്‍, സി പി നാരായണന്‍ നായര്‍, പയ്യാടക്കന്‍ കുഞ്ഞിരാമന്‍ നായര്‍, അലാമി കണ്ണന്‍, പി കെ കണ്ണന്‍, മുണ്ടയില്‍ അമ്പു, പന്നിക്കേന്‍ കുമാരന്‍, കുണ്ടിലേ വീട്ടില്‍ നാരായണന്‍, ആട്ടി ചെറിയമ്പു എന്നിവരെ ഈ അവസരത്തില്‍ ആദരപൂര്‍വ്വം അനുസ്മരിക്കുന്നു. കൂടാതെ ആദ്യകാല അധ്യാപകരായിരുന്ന ഒളവറയിലെ ശ്രീ പി വി ബാലകൃഷ്ണൻ മാസ്റ്റര്‍, ശ്രീ വി കെ നാരായണന്‍ മാസ്റ്റര്‍ എന്നിവരേയും . സ്വന്തം കൈവശസ്ഥലം വിദ്യാലയാവശ്യത്തിനായി വിട്ടുതന്ന വിദ്യാലയ സ്ഥാപകന്‍ കൂടിയായ ശ്രീ നല്ലൂര്‍ ഗോവിന്ദന്‍ നായരേയും ദാനാധാരമായി പ്രസ്തുത സ്ഥലത്തിന്റെ രേഖ കൈമാറിത്തന്ന കമ്പല്ലൂർ കോട്ടയില്‍ ശ്രീമതി ശാന്തകുമാരിയമ്മയേയും ഈ അവസരത്തില്‍ കടപ്പാടോടും കൃതജ്ഞതയോടുകൂടി ഓര്‍ക്കുന്നു. 1957ല്‍ ശ്രീ ഇ എം എസ് നമ്പൂതിരിപ്പാടിന്റെ നേതൃത്വത്തില്‍ നിലവില്‍ വന്ന സര്‍ക്കാര്‍, ഏകാധ്യാപക വിദ്യാലയത്തെ എല്‍ പി സ്കൂളായും 1964ല്‍ യു പി സ്കൂളായും ഉയര്‍ത്തി. 1980-81ല്‍ശ്രീ ഇ കെ നായനാര്‍ മുഖ്യമന്ത്രിയായപ്പോള്‍ ഈ വിദ്യാലയം ദീര്‍ഘകാലത്തെ ജനകീയാവശ്യം പരിഗണിച്ച് ഹൈസ്കൂളായി അപ്ഗ്രേഡുചെയ്തു. ഈ അവസരത്തില്‍ വിദ്യാലയ വികസനത്തിനായി പരിമിതമായ വിലയ്ക്ക് സ്ഥലം നല്കാന്‍ തയ്യാറായ സര്‍വ്വശ്രീ കൊച്ചു നാരായണന്‍ മാസ്റ്റര്‍, പത്മിനി ടീച്ചര്‍, നല്ലൂര്‍ കുഞ്ഞിരാമന്‍ നായര്‍, മുട്ടിയറ ചെല്ലപ്പന്‍ എന്നിവരേയും നന്ദിപൂര്‍വ്വം അനുസ്മരിക്കുന്നു. 1990-91 ല്‍ കേരളത്തില്‍ ആദ്യമായി ഹയര്‍ സെക്കന്ററി വിദ്യാലയങ്ങള്‍ ആരംഭിച്ചപ്പോള്‍ അന്നത്തെ മുഖ്യമന്ത്രിയായിരുന്ന ശ്രീ ഇ കെ നായനാര്‍ ഉദ്ഘാടനം നിര്‍വ്വഹിച്ചതിലൂടെ കേരളത്തിലെ ആദ്യ ഹയര്‍ സെക്കന്ററി എന്ന വിശേഷണവും ഈ വിദ്യാലയത്തിന്‌ ഒരു പൊന്‍തൂവലായി. ഇതിനു വേണ്ടി അശ്രാന്ത പരിശ്രമം ചെയ്ത അന്നത്തെ ഗ്രാമവികസന ബോർഡ് ചെയര്‍മാനും ഈ കെ നായനാരുടെ മണ്ഡലം പ്രതിനിധിയുമായ ശ്രീ സി കൃഷ്ണന്‍നായരുടെ സേവനവും ഈ അവസരത്തില്‍ സ്മരിക്കുന്നു. ഇന്ന് വിദ്യാലയത്തിന്‌ ഷഷ്ഠിപൂര്‍ത്തിയും ഹയര്‍സെക്കന്ററിക്ക് രജതരേഖയും തികയുമ്പോള്‍ അഭിമാനപൂര്‍വ്വം ഈ നാടിനെ സാക്ഷിനിര്‍ത്തി ഞങ്ങള്‍ക്ക് പറയാനാകും. കഴിഞ്ഞുപോയ കാലയളവുകളില്‍ • നാടിന്റെ സമ്പൂര്‍ണ്ണമായ പിന്തുണയോടെയാണ്‌ ഈ വിദ്യാലയം വളര്‍ച്ചയുടെ ഓരോ പടവുകളും കയറിയിട്ടുള്ളത്. • ഓരോ കാലഘട്ടങ്ങളിലും മികച്ച നിലവാരമുള്ള വിദ്യാഭ്യാസമാണ്‌ പകര്‍ന്നു നല്കാനായിട്ടുള്ളത്. • കലാ കായിക മേഖലകളില്‍ ഓരോ കാലയളവുകളിലും മികച്ച പ്രതിഭകളെ സൃഷ്ടിക്കുവാന്‍ വിദ്യാലയത്തിന്‌ കഴിഞ്ഞിട്ടുണ്ട്. അതിന്‌ ഉദാഹരണമാണ്‌ ഇപ്പോള്‍ നടക്കുന്ന ദേശീയ ഗെയിംസില്‍ വനിതാ വിഭാഗം ബീച്ച് ഹാന്‍ഡ്ബോളില്‍ കേരളത്തെ പ്രതിനിധാനം ചെയ്യുന്ന എ വി രശ്മി, കെ വി നീതു, അനുശ്രീ ടി കെ എന്നിവര്‍. • എസ് എസ് എല്‍ സി, ഹയര്‍ സെക്കന്ററി പരീക്ഷകളില്‍ മികച്ച വിജയശതമാനം നിലനിര്‍ത്തി വരുന്നുണ്ട്. എസ് എസ് എല്‍ സിയി ല്‍തുടര്‍ച്ചയായ നാലാം വര്‍ഷവും നൂറു ശതമാനം നിലനിര്‍ത്തുവാന്‍ കഴിഞ്ഞിട്ടുണ്ട്. • എന്‍എസ്സ് എസ്സ്, സ്കൗട്ട് & ഗൈഡ്സ്, ജൂനിയർ റെഡ്ക്രോസ്സ് തുടങ്ങിയ സംഘടനകള്‍ സാമൂഹ്യപ്രതിബദ്ധതയുള്ള നിരവധി പ്രവര്‍ത്തനങ്ങളിലൂടെ വിദ്യാര്‍ഥികളില്‍ സാമൂഹ്യബോധം വളര്‍ത്തുവാനും നാടിന്‌ ദിശാബോധം പകരുവാനും നിരന്തരമായ പ്രവര്‍ത്തനങ്ങളില്‍ ഏര്‍പ്പെട്ടുവരുന്നു. • സംസ്ഥാനതലത്തില്‍ പ്രവര്‍ത്തന മികവിനുള്ള പരിസ്ഥിതി മന്ത്രാലയത്തിന്റെ മികച്ച ഭൂമിത്രസേനാ ക്ളബ്ബിനുള്ള പുരസ്കാരം, മലയാള മനോരമയുടെ പലതുള്ളി പുരസ്കാരം തുടങ്ങിയ അംഗീകാരങ്ങള്‍. • ജില്ലാ തലത്തില്‍ വര്‍ഷങ്ങളായി മികച്ച ജൂനിയര്‍ റെഡ്ക്രോസ്സ് യൂണിറ്റ്, മികച്ച ശുചിത്വ വിദ്യാലയം മലയാള മനോരമയുടെ വഴിക്കണ്ണ്‌ പുരസ്കാരം, ജലശുദ്ധി പരിശോധനയ്ക്കുള്ള പുരസ്കാരം, നല്ലപാഠം പുരസ്കാരം തുടങ്ങിയ അംഗീകാരങ്ങള്‍. • മലയാളത്തിന്റെ പ്രിയ കഥാകാരനായ ശ്രീ സി വി ബാലകൃഷ്ണന്‍ മാസ്റ്റര്‍, നിരൂപകനും ബാലസാഹിത്യകാരനും ശാസ്ത്രസാഹിത്യകാരനുമായ ശ്രീ പി പി കെ പൊതുവാള്‍, മികച്ച അധ്യാപകനുള്ള ദേശീയ പുരസ്കാരം നേടിയ ശ്രീ വി പി എസ് നമ്പൂതിരി, , മികച്ച എന്‍ എസ്സ് എസ്സ് പ്രോഗ്രാം ഓഫീസര്‍ക്കുള്ള സ്പെഷ്യല്‍പുരസ്കാരം നേടിയ ശ്രീ സി കെ രാധാകൃഷ്ണന്‍ മാസ്റ്റര്‍ തുടങ്ങി അവാര്‍ഡുകളിലൂടെയും അല്ലാതെയും പ്രവര്‍ത്തന മികവുകളിലൂടെ ബഹുമാനിതരായ ഗുരുശ്രേഷ്ഠന്മാര്‍. • മികച്ച അധ്യാപക രക്ഷാകര്‍ത്തൃ സമിതികളിലൂടെ വിദ്യാലയ പുരോഗതിക്കായി നിരവധി പരിശ്രമങ്ങള്‍ ഉണ്ടായിട്ടുണ്ട്. • അധ്യാപനം ജീവിതവ്രതമാക്കിയ നിരവധി അധ്യാപകശ്രേഷ്ഠരുടെ കാല്പാടുകള്‍ പതിഞ്ഞ ഈ സരസ്വതീ ക്ഷേത്രം അവരുടെ അര്‍പ്പണ ബോധത്തിന്റെ ജീവനുള്ള സ്മാരകമാണ്‌. • അവര്‍ തെളിച്ച തിരിവെട്ടത്തെ ദീപശിഖകളായി നെഞ്ചേറ്റിയ അനവധിപേരുടെ ജീവിതവിജയത്തിന്റെ നിത്യസ്മാരകമാണ്‌ ഈ വിദ്യാലയം. ഇവിടെ അക്ഷരം കുറിച്ച് അതിര്‍ത്തികളില്‍ രാജ്യത്തെ കാത്തവരും കാക്കുന്നവരുമായ ജവാന്മാര്‍, കായിക മേഖലയിൽ രാജ്യത്തിനും കേരളത്തിനും വേണ്ടി കഴിവു തെളിയിച്ച പ്രതിഭകള്‍, പൊതുപ്രവര്‍ത്തന മികവിലൂടെ സമൂഹമനസ്സുകളില്‍ സ്ഥാനം നേടിയ നിരവധിപേര്‍, കലാപരമായി കഴിവുതെളിയിച്ചവര്‍, വിവിധ തൊഴില്‍ മേഖലകളില്‍ രാജ്യസേവനം നടത്തുന്നവര്‍, മണ്ണിനെ പൊന്നാക്കുന്ന കര്‍ഷകര്‍, അദ്ധ്വാനശീലരായ നിരവധിപേര്‍. അവര്‍ ചെയ്ത് സഹായങ്ങള്‍ നന്ദിപൂര്‍വ്വം ഓര്‍ക്കുന്നു, വിദ്യാലയ പുനര്‍നിര്‍മ്മാണത്തിന്‌ അവരുടെ നിര്‍ലോപമായ സഹായങ്ങള്‍ പ്രതീക്ഷിക്കുന്നു. ഇങ്ങനെ വളര്‍ച്ചയുടെ പടവുകള്‍ ഓരോന്നായി കയറുമ്പോഴും പരാതികളുടേയും പരിവട്ടങ്ങളുടേയും ഒരു പരമ്പരതന്നെ പറയാന്‍ ബാക്കിയുണ്ട്. • ഹയര്‍ സെക്കന്ററി ഹൈസ്കൂള്‍ ക്ളാസ് മുറികള്‍ക്ക് സൗകര്യമുള്ള ലാബും ലൈബ്രറിയും മറ്റു സംവിധാനങ്ങളുമുള്ള ഒരു കെട്ടിട സമുച്ചയം നമ്മുടെ അനിവാര്യതയാണ്‌. പ്രത്യേകിച്ചും 1985ല്‍ ശ്രീ ഒ ഭരതന്‍ ഏം എല്‍ എ ആയിരിക്കേ അന്നത്തെ വിദ്യാഭ്യാസവകുപ്പു മന്ത്രി ശ്രീ ടി എം ജേക്കബ്ബ് ഉദ്ഘാടനം ചെയ്ത രണ്ടു നില കെട്ടിടം ഉപയോഗ്യ ശൂന്യമായിക്കൊണ്ടിരിക്കുമ്പോള്‍. • വിദ്യാലയത്തിന്‌ ആവശ്യമുള്ള മികച്ച ഇരിപ്പിട സൗകര്യങ്ങള്‍. • അസംബ്ളി ഹാള്‍. • സ്മാര്‍ട്ട് സൗകര്യങ്ങളോടു കൂടിയ ക്ളാസ് മുറികള്‍ • ഹയര്‍ സെക്കന്ററിക്ക് മികച്ച സൗകര്യങ്ങളോടു കൂടിയ കമ്പ്യൂട്ടര്‍ ലാബ്. • റീഡിംഗ് റൂം ഉള്‍പ്പെടെയുള്ള ലൈബ്രറി കോംപ്ളക്സ്. • കുട്ടികള്‍ക്ക് ഇരുന്നു ഭക്ഷണം കഴിക്കാനുള്ള ഊട്ടുപുര. • കിഡ്സ് പ്ളേ പാര്‍ക്ക്. • ടോയിലറ്റ് കോമ്പ്ളക്സ്. തുടങ്ങി ആവശ്യങ്ങള്‍ ഇനിയുമേറെയാണ്‌. ഭരണകൂടത്തിന്റേയും ജനപ്രതിനിധികളുടേയും പൊതു സമൂഹത്തിന്റേയും പിന്തുണയോടെ ഭൗതിക സാഹ ചര്യത്തിലും അക്കാദമിക നിലവാരത്തിലും രാജ്യാന്തര നിലവാരത്തിലേക്ക് ഈ വിദ്യാലയത്തെ ഉയര്‍ത്തുവാനുള്ള പരിശ്രമങ്ങളുടെ തുടക്കമാകട്ടെ ഈ ജൂബിലി വര്‍ഷമെന്നു ആഗ്രഹിച്ചുകൊണ്ട് ഈ റിപ്പോര്‍ട്ട് സമര്‍പ്പിക്കുന്നു. തയ്യാറാക്കിയത് ബൈജു കെ.പി , ബ്ലോഗിലേക്ക് ലിപി പരിഷ്കാരത്തോടെ പകര്‍ത്തിയത്- രാധാകൃഷ്ണന്‍ സി കെ

Wednesday, July 18, 2018

ശാസ്ത്രപക്ഷാചരണം HSS

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ ഹയര്‍ സെക്കന്ററി വിഭാഗത്തില്‍ സയന്‍സ് ഫോറം രൂപീകരിച്ചു. ചാന്ദ്രപക്ഷാചരണത്തിന്റെ ഭാഗമായി നാളെ (19-07-2018) ശാസ്ത്രക്ലാസ് നയിച്ചുകൊണ്ട് വെള്ളൂര്‍ ഗംഗാധരന്‍ മാസ്റ്റര്‍ ഫോറത്തിന്റെ ഔപചാരികമായ ഉദ്ഘാടനം നിര്‍വ്വഹിക്കും. ചാന്ദ്രപക്ഷാചരണത്തിന്റെ ഭാഗമായി പോസ്റ്ററുകള്‍ തയ്യാറാക്കുവാനും ക്വിസ് മല്‍സരം സംഘടിപ്പിക്കുവാനും ശാസ്ത്ര കലണ്ടര്‍ തയ്യാറാക്കുവാനും സയന്‍സ് ഫോറം തീരുമാനിച്ചു. മെല്‍ബില്‍ ബിജു, അര്‍ഷ ഫാത്തിമ എന്നീ കുട്ടികള്‍ സയന്‍സ് ഫോറത്തിന്റെ ഭാരവാഹികളായി ചുമതലയേറ്റു. ജിഷ ടീച്ചര്‍, മിനു ടീച്ചര്‍ എന്നിവര്‍ യോഗത്തിനു നേതൃത്വം നല്‍കി.

Tuesday, July 17, 2018

ക്ലാസ് പി ടി എ +2 ജൂലൈ 2018

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ രണ്ടാം വര്‍ഷ ഹയര്‍ സെക്കന്ററി ക്ലാസുകളിലെ ക്ലാസ് പി ടി എ യോഗം നടന്നു. പ്രിന്‍സിപ്പാള്‍ കെ ഡി മാത്യു മാസ്റ്റര്‍, കിഷോര്‍ മാസ്റ്റര്‍ എന്നിവര്‍ സംസാരിച്ചു.

Monday, July 16, 2018

സ്കൂള്‍ ഡയറി, സ്കൂള്‍ കലണ്ടര്‍

ഈ വര്‍ഷത്തെ അക്കാദമിക് പ്രവര്‍ത്തനങ്ങള്‍ മെച്ചപ്പെടുത്തുന്നതിനും ചിട്ടപ്പെടുത്തുന്നതിനുമായി സ്കൂള്‍ ഡയറി, സ്കൂള്‍ കലണ്ടര്‍ കമ്മറ്റികള്‍ ഇന്നു (16-07-2018) യോഗം ചേര്‍ന്നു. 40 പേജുള്ള സ്കൂള്‍ ഡയറിക്ക് അന്തിമരൂപം നല്‍കി. അത് അച്ചടിക്കു നല്‍കുവാന്‍ തീരുമാനിച്ചു.

തയ്യാറാക്കിയ സ്കൂള്‍ കലണ്ടര്‍ അംഗീകരിച്ചു. അതിലെ ഓരോ പ്രവര്‍ത്തനവും ആരു നടത്തണമെന്നു നിശ്ചയിച്ച് കലണ്ടര്‍ പൂര്‍ത്തീകരിക്കുവാന്‍ തീരുമാനിച്ചു. ബന്ധപ്പെട്ട വിഷയസമിതികളോ ക്ലബ്ബ് ചുമതലയുള്ള അദ്ധ്യാപകരോ കൂടിയിരുന്ന് ഒരാഴ്ചയ്ക്കുള്ളില്‍ പ്രവര്‍ത്തന പരിപാടികള്‍ പ്ലാന്‍ ചെയ്യണമെന്ന് യോഗം നിര്‍ദ്ദേശിച്ചു. പ്രവര്‍ത്തന പരിപാടിയും പ്രസ്തുത ദിനത്തെക്കുറിച്ചുള്ള ലഘു കുറിപ്പും കൂട്ടിച്ചേര്‍ത്ത് കലണ്ടര്‍ ഡി റ്റി പി ചെയ്ത് പുസ്തകമാക്കിമാറ്റുവാനും തീരുമാനമായി. കെ പി രമേശന്‍, കെ പി ബൈജു, കെ പി അച്യുതന്‍, കെ മുസ്തഫ, ലതാഭായി കെ ആര്‍, നിമ്മി ജോസഫ്, സിമി ടീച്ചര്‍, മനോജ്കുമാര്‍ കെ എന്‍, ജോസ് ജേക്കബ് എന്നിവര്‍ യോഗത്തില്‍ പങ്കെടുത്തു,

പദപ്രശ്നം 2

കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ വിദ്യാരംഗം കലാ സാഹിത്യവേദി സംഘടിപ്പിച്ചുവരുന്ന പദപ്രശ്നപൂരണ മല്‍സരത്തിന്റെ രണ്ടാം ലക്കത്തില്‍ 9 എ ക്ലാസിലെ ദേവിക ആര്‍ നായര്‍ വിജയിയായി.

ഹയര്‍ സെക്കന്ററി അക്കാദമിക് പ്ലാനിംഗ് ജൂലൈ 2018

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ ഹയര്‍ സെക്കന്ററി വിഭാഗത്തില്‍ പാഠ്യ-പാഠ്യാനുബന്ധപ്രവര്‍ത്തനങ്ങള്‍ സജീവമാക്കാന്‍ അക്കാദമിക് ആസൂത്രണയോഗത്തില്‍ തീരുമാനമായി.

ഇതിന്റെ ഭാഗമായി രണ്ടാം വര്‍ഷ വിദ്യാര്‍ത്ഥികളുടെ ക്ലാസ് പി ടി എ യോഗം ജൂലൈ 17ന് ചൊവ്വാഴ്ച ഉച്ചയ്ക്ക് 2 മണിക്ക് നടക്കും. മി‍ഡ്ടേം പരീക്ഷയുടെ പഠനനിലവാരവും ഇംപ്രൂവ്മെന്റ് പരീക്ഷയുടെ തയ്യാറെടുപ്പുകളും യോഗം വിലയിരുത്തും.

ഒന്നാം വര്‍ഷ വിദ്യാര്‍ത്ഥികളുടെ മിഡ്ടേം പരീക്ഷ ജൂലൈ 24 മുതല്‍ നടക്കും. ക്ലാസ് പി ടി എ യോഗം ആഗസ്റ്റ് ആദ്യവാരമുണ്ടാകും.

എന്‍ എസ്സ് എസ്സ്, സ്കൗട്ട് & ഗൈഡ്സ് എന്നിവയ്ക്കു പുറമേ സൗഹൃദ ക്ലബ്ബ്, കരിയര്‍ ഗൈഡന്‍സ് സെല്‍, സയന്‍സ് ഫോറം, സോഷ്യല്‍ സയന്‍സ് ഫോറം, സാഹിത്യവേദി, ലൈബ്രറി എന്നിവയുടെ പ്രവര്‍ത്തനങ്ങള്‍ സജീവമാക്കും.
സയന്‍സ് ഫോറത്തിന്റെ ഉദ്ഘാടനം ചാന്ദ്രപക്ഷാചരണത്തിന്റെ ഭാഗമായി വെള്ളൂര്‍ ഗംഗാധരന്‍ മാസ്റ്റര്‍ ജൂലൈ 19ന് വ്യാഴാഴ്ച രാവിലെ നിര്‍വ്വഹിക്കും. (ചുമതല ജിഷ ബി)
ആഗസ്റ്റ് 6ന് ഹിരോഷിമ ദിനാചരണത്തിന്റെ ഭാഗമായി സോഷ്യല്‍ സയന്‍സ് ഫോറത്തിന്റെ ഉദ്ഘാടനം നടക്കും. (ചുമതല രാജേഷ് കെ ഒ)
ജൂലൈ അവസാനവാരം പാലിയേറ്റീവ് പ്രവര്‍ത്തനങ്ങള്‍ക്ക് എന്‍ എസ്സ് എസ്സ്, സ്കൗട്ട് & ഗൈഡ്സ് എന്നിവരുടെ നേതൃത്വത്തില്‍ തുടക്കം കുറിക്കും. (ചുമതല ശ്രീകാന്ത് സി)
ലഹരിവിരുദ്ധപ്രവര്‍ത്തനങ്ങള്‍ക്ക് എന്‍ എസ്സ് എസ്സ്, സ്കൗട്ട് & ഗൈഡ്സ് വളണ്ടിയര്‍മാര്‍ നേതൃത്വം നല്‍കും. (ചുമതല ഡെന്നിസ് കുര്യന്‍)
കാര്‍ഷിക പ്രവര്‍ത്തനങ്ങള്‍ക്ക് ചിങ്ങം ഒന്നിന് ആരംഭമാകും. അന്ന് കര്‍ഷകരെ ആദരിക്കും. (ചുമതല പ്രവീണ്‍കുമാര്‍ പി ടി)
സ്വാതന്ത്ര്യദിനാഘോഷപരിപാടിയില്‍ ഹയര്‍സെക്കന്ററി കുട്ടികളുടെ നേതൃത്വത്തില്‍ ലഘുനാടകം അവതരിപ്പിക്കും.(ചുമതല മനോജ്കുമാര്‍ കെ എന്‍)
കുട്ടികളുടെ ദേശഭക്തിഗാനാലാപനം സംഘടിപ്പിക്കും. (ചുമതല ബാലാമണി പി ബി)
കരിയര്‍ ഗൈഡന്‍സുമായി ബന്ധപ്പെട്ട ക്ലാസുകളും ശില്‍പശാലകളും ഓരോ ടേമിലും നടത്തും. (ചുമതല മനോജ്കുമാര്‍ കെ എന്‍)
സൗഹൃദ ക്ലബ്ബ് പെണ്‍കുട്ടികളുടെ ശാക്തീകരണവുമായി ബന്ധപ്പെട്ട പരിപാടികള്‍ക്ക് ആഗസ്റ്റ് മാസത്തില്‍ തുടക്കമിടും. (ചുമതല ബാലാമണി പി ബി)
ഭാഷാധ്യാപകരുടെ നേതൃത്വത്തില്‍ സാഹിത്യവേദി സജീവമായ പ്രവര്‍ത്തനങ്ങള്‍ ആരംഭിച്ചുകഴിഞ്ഞു. രണ്ടാഴ്ചയില്‍ ഒരിക്കല്‍ ,സാഹിത്യവേദി അംഗങ്ങള്‍ യോഗം ചേരുകയും ചര്‍ച്ചകള്‍സേഘടിപ്പിക്കുകയും ചെയ്യും. കുട്ടികളുടെ രചനകള്‍ അവതരിപ്പിക്കുവാനും യോഗങ്ങളില്‍ അവസരമുണ്ടാകും. വിദ്യാരംഗം കലാസാഹിത്യവേദിയുമായി കൂടിച്ചേര്‍ന്ന് ജൂലൈ മാസത്തില്‍ ഈ വര്‍ഷത്തെ ഇന്‍ലന്റ് മാഗസിന്റെ ആദ്യ ലക്കം പുറത്തിറക്കും. (ചുമതല ബൈജു കെ പി)
ലൈബ്രറി പുസ്തകവിതരണം കൂടുതല്‍ കാര്യക്ഷമമാക്കും. (ചുമതല ബാലാമണി പി ബി)

ലോകകപ്പ് ഫുട്ബോള്‍ പ്രശ്നോത്തരി

ലോകകപ്പ് ഫുട്ബോള്‍ മല്‍സരങ്ങളുടെ ഭാഗമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ പ്രശ്നോത്തരി സംഘടിപ്പിച്ചു. കെ പി രമേശന്‍ മാസ്റ്റര്‍ ക്വിസ് മാസ്റ്ററായി. ടാര്‍ലി, ആന്‍സ്, പ്രീതി പ്രകാശ് എന്നിവര്‍ നേതൃത്വം നല്കി.

വിജയികള്‍

ഒന്നാം സ്ഥാനം അതുല്‍ മനോജ് 10 ബി

രണ്ടാം സ്ഥാനം എബിന്‍കുമാര്‍ 9 ബി

മൂന്നാം സ്ഥാനം ടിനന്‍ ഒ കെ 9 ബി

വിജയികള്‍ക്ക് അനുമോദനങ്ങള്‍

Saturday, July 14, 2018

ബഷീര്‍ നാടകാവതരണം

വൈക്കം മുഹമ്മദ് ബഷീറിന്റെ രചനകളെ അടിസ്ഥാനമാക്കി കമ്പല്ലൂര്‍ ഗവ ഹയര്‍ സെക്കന്ററി സ്കൂളിലെ കുട്ടികള്‍ അവതരിപ്പിച്ച നാടകാവതരണം ശ്രദ്ധേയമായി. ബഷീറിന്റെ ബാല്യകാലസഖി, പൂവന്‍പഴം, മതിലുകള്‍, ഭൂമിയുടെ അവകാശികള്‍, പ്രേമലേഖനം, ന്റുപ്പുപ്പാക്കൊരാനേണ്ടാര്‍ന്ന് തുടങ്ങിയ രചനകളിലെ കഥാസന്ദര്‍ഭങ്ങളെയാണ് കുട്ടികള്‍ ലഘുനാടകങ്ങളാക്കി അവതരിപ്പിച്ചത്. വായനയിലൂടെ ബഷീറിന്റെ ലോകത്തെ അറിയാനുള്ള പ്രേരണയായിമാറി പരിപാടി. അദ്ധ്യാപകനായ കെ എന്‍ മനോജ്കുമാറാണ് നാടകരൂപങ്ങഴുടെ രംഗസാക്ഷാത്കാരം നിര്‍വ്വഹിച്ചത്.

Monday, July 9, 2018

വായനപക്ഷാചരണം സമാപനം

കമ്പല്ലൂര്‍ ഗവ. ഹയര്‍ സെക്കന്ററി സ്കൂളില്‍ വിപുലമായ പരിപാടികളോടെ നടന്ന വായനപക്ഷാചരണത്തിന്റെ സമാപനം ജൂലൈ 9ന് തിങ്കളാഴ്ച നടന്നു. പ്രസിദ്ധ കഥാകാരി ജയലക്ഷ്മി ടീച്ചര്‍ പരിപാടി ഉദ്ഘാടനം ചെയ്തു. ഹെഡ്‌മാസ്റ്റര്‍ വി വി ഭാര്‍ഗവന്‍ മാസ്റ്റര്‍ അദ്ധ്യക്ഷത വഹിച്ചു. കെ എന്‍ മനോജ്കുമാര്‍ മുഖ്യ പ്രഭാഷണം നടത്തി. 9 ബി ക്ലാസിലെ കുട്ടികള്‍ തയ്യാറാക്കിയ വായനക്കുറിപ്പുകളുടെ പതിപ്പ് സ്റ്റാഫ് സെക്രട്ടറി കെ പി ബൈജു പ്രകാശനം ചെയ്തു. വിദ്യാരംഗം കലാ സാഹിത്യവേദി കണ്‍വീനര്‍ ലതാഭായി കെ ആര്‍ ആശംസകളര്‍പ്പിച്ചു സംസാരിച്ചു. വായനപക്ഷാചരണത്തിന്റെ ഭാഗമായി സംഘടിപ്പിച്ച വിവിധ മല്‍സരങ്ങളില്‍ സമ്മാനര്‍ഹരായ വിദ്യാര്‍ത്ഥികള്‍ക്ക് കെ പി രമേശന്‍ ഉപഹാരങ്ങള്‍ സമര്‍പ്പിച്ചു. ആരതി ഷിബു സ്വാഗതവും ആതിര കെ ആര്‍ നന്ദിയും പറഞ്ഞു. എലിസബത്ത് കെ ചാണ്ടി, ഊര്‍മ്മിള സി എം, കെ പി അച്യുതന്‍, ജോസ് ജേക്കബ്, ജോസഫ് പി ജെ, മുസ്തഫ കെ, പ്രമീള പി വി തുടങ്ങിയവര്‍ നേതൃത്വം നല്‍കി.

Sunday, July 8, 2018

ബഷീര്‍ നാടകീകരണം

വൈക്കം മുഹമ്മദ് ബഷീറിന്റെ രചനകളിലെ ഉജ്ജ്വല മുഹൂര്‍ത്തങ്ങളെ നാടകരൂപത്തില്‍ അവതരപ്പിക്കുവാന്‍തയ്യാറെടുക്കുകയാണ് കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ കുട്ടികള്‍. അവധിക്കാലത്തു നടന്ന നാടകക്കളരിയുടെ തുടര്‍ച്ചയായാണ് പരിശീലനം നടക്കുന്നത്. നാല്‍പ്പതു മിനിട്ട് ദൈര്‍ഘ്യമുള്ള പരിപാടിയില്‍ കഥാകാരനും കഥാപാത്രങ്ങളും അരങ്ങലെത്തും. അദ്ധ്യാപകനായ മനോജ്കുമാര്‍ കെ എന്‍ പരിശീലനത്തിനു നേതൃത്വം നല്കി.

ബഷീര്‍ദിനപ്രശ്നോത്തരി

ബഷീര്‍ ദിനാചരണത്തിന്റെ ഭാഗമായി കമ്പല്ലൂര്‍ ഗവ. ഹയര്‍ സെക്കന്ററി സ്കൂളിലെ വിദ്യാരംഗം കലാസാഹിത്യവേദി പ്രശ്നോത്തരി സംഘടുപ്പിച്ചു. വൈക്കം മുഹമ്മദ് ബഷീറിന്റെ രചനകളും ജീവിതവുമായി ബന്ധപ്പെട്ട ചോദ്യങ്ങളാണ് പ്രശ്നോത്തരിയില്‍ ഉള്‍പ്പെടുത്തിയത്.

വിജയികൾ

1. അനന്യ.കെ 9B

2. ദേവിക R നായർ 9A

3.നമിത മധു 9A

ആന്‍സ്, ശ്രീപ്രിയ, ലതാഭായി കെ ആര്‍ എന്നിവര്‍ നേതൃത്വം നല്‍കി.

വിജയികള്‍ക്ക് അനുമോദനങ്ങള്‍.